خبرنامہ

صنعاء: (ملت+اے پی پی) یمنی فوج نے حالیہ مہینوں کے دوران صوبے مآرب میں قریباً 36 ہزار بارودی سرنگیں تلف کردی ہیں۔ہزاروں کی تعداد میں یہ بارودی سرنگیں حوثی ملیشیا اور معزول صدر علی عبداللہ صالح کے وفادار فوجیوں نے بچھائی تھیں۔یمنی فوج کے ملٹری انجنیئرنگ یونٹ کے سربراہ بریگیڈیئر جنرل شیخ زاید ثابت نے کے روز صحافیوں کو بتایا ہے کہ ان میں سے ہزاروں بارودی سرنگیں دوسری عالمی جنگ کے زمانے سے تعلق رکھتی تھیں۔اس کے علاوہ مقامی ، روسی اور ایرانی ساختہ بارودی سرنگیں تباہ کی گئی ہیں۔یمنی انسانی حقوق کی ایک حالیہ رپورٹ کے مطابق صوبے مآرب میں بارودی سرنگوں کے دھماکوں میں 47 افراد ہلاک اور 98 زخمی ہوئے ہیں۔ انسانی حقوق کی عالمی تنظیم ہیومن رائٹس واچ کی ایک رپورٹ کے مطابق تعز میں بارودی سرنگوں کے دھماکوں میں 23 افراد ہلاک اور 56 زخمی ہوگئے تھے۔صدر عبد ربہ منصور ہادی کی وفادار عوامی مزاحمتی فورسز کا کہنا ہے کہ حوثی ملیشیا اور معزول صدر علی عبداللہ صالح کے وفادار جنگجوؤں نے تعز کے مختلف علاقوں میں مارچ 2015ء کے بعد 40 ہزار سے زیادہ بارودی سرنگیں بچھائی ہیں۔