خبرنامہ بلوچستان

کوئٹہ(ملت + آئی این پی )فرنٹیئرکوربلوچستان کے جاری کردہ بیان میں کہاگیاہے کہ ڈیرہ بگٹی میں بلوچ ری پبلکن آرمی کے 43فراریوں نے براہمداغ بگٹی کی ہندوستان سے میل رغبت اور پاکستان کے خلاف زہر اگلنے کی بدولت ان سے لا تعلقی کا اظہار کرتے ہوئے سیکیورٹی فورسز کی نگرانی میں ہتھیار ڈالنے کا اعلان کیا ہے ،براہمداغ بگٹی کی ہندوستان کے ساتھ گٹھ جوڑ پر تشویش کا اظہار کرتے ہوئے بلوچ ری پبلکن پارٹی اور کا لعدم تنظیم بی آر اے کے مزیددرجنوں کارندے اور حمایتی ان سے راہیں علیحدہ کرنے کا اعلان کررہے ہیں۔جس سے براہمداغ بگٹی اور اس کے قریبی کمانڈر ز حواس باختہ ہو کر اظہار لا تعلقی اور سرنڈرکا اعلان کرنے والے فراریوں کو نقصان پہنچانے کے درپے ہو گئے ہیں۔ گزشتہ روز بھی بی آر اے کے چند دہشتگردوں نے سرنڈر فراریوں کے گاؤں بانڑی پر حملہ کرتے ہوئے 1500کے قریب مال مویشی ہتھیا کر ساتھ لے گئے جس پر ایف سی نے بر وقت کارروائی کرتے ہوئے چھترمیں دو دہشتگرد وں کو ٹھکانے لگا کر ہتھیائے ہوئے مال مویشی کو برآمد کر کے مالکان کے حوالے کیا ۔واضح رہے براہمداغ بگٹی کی انڈین میلان اور وہاں پر پناہ لینے کی درخواست پر ان کے ہمدرد اور حمایتی ایک ایک کر کے ان سے اظہار لاتعلقی کا اعلان کر رہے ہیں ۔جبکہ دوسری جانب بی آر اے کے بچے کچے دہشتگرد سرنڈر ہونے والے فراریوں کو مختلف حیلوں بہانوں سے تنگ کرکے ان سے زبر دستی تخریبی کارروائیاں کروانے پر تلے ہوئے ہیں ۔تاہم ڈیرہ بگٹی اور گردو نواح میں تعینات سیکیورٹی فورسز کی ہر ممکن کوشش ہے کہ باقی ماندہ دہشتگرد وں کو ٹھکانے لگا کر عوام کو ان کے ظلم و ستم سے چھٹکارہ دلائے ۔