لاہور:(ملت آن لائن) سابق وزیر خزانہ اسحاق ڈار کے گھر سے کروڑوں روپے مالیت کی 2 قیمتی گاڑیاں غائب ہونے کے بعد قومی احتساب بیورو (نیب) لاہور نے ایکسائز ڈیپارٹمنٹ سے گاڑیاں ڈھونڈنے کے لیے مدد مانگ لی۔
نیب کی جانب سے ایکسائز ڈپارٹمنٹ کو بھجوائے گئے مراسلے کے مطابق گلبرگ تھری میں واقع اسحاق ڈار کی رہائش گاہ سے 2 قیمتی گاڑیاں مرسڈیز بینز اور لینڈ کروزر غائب ہیں۔
مراسلے کے مطابق ایکسائز ڈیپارٹمنٹ گاڑیوں کی تلاش میں نیب کی معاونت کرے۔
واضح رہے کہ پاناما کیس کے فیصلے کی روشنی میں نیب نے اسحاق ڈار کے خلاف آمدن سے زائد اثاثوں کا ریفرنس احتساب عدالت میں دائر کر رکھا ہے جس میں انہیں مفرور قرار دیا جاچکا ہے۔
سابق وزیر خزانہ کو وطن واپس لانے کے لیے ایف آئی اے کی جانب سے ریڈ وارنٹ جاری کرتے ہوئے انٹرپول کو بھی درخواست دی جاچکی ہے۔
گزشتہ ماہ 2 اکتوبر کو احتساب عدالت نے عدم پیشی پر سابق وزیر خزانہ اسحاق ڈار کے بینک اکاؤنٹس اور جائیداد کو نیلام کرنے کا حکم دیا تھا۔
نیب کی جانب سے عدالت میں جمع کروائی گئی اسحاق ڈار کی جائیداد کی تفصیلات کے مطابق سابق وزیر خزانہ کے دبئی میں 3 فلیٹس، گلبرگ لاہور میں ایک گھر، چار پلاٹس اور اسلام آباد میں بھی 4 پلاٹس ہیں۔
نیب کے مطابق اسحاق ڈار اور ان کی اہلیہ کے پاس پاکستان میں 6 گاڑیاں ہیں، جن میں 3 لینڈ کروزر، 2 مرسڈیز اور ایک کرولا گاڑی شامل ہے۔
تاہم 10 اکتوبر کو احتساب عدالت میں جمع کروائی گئی نیب رپورٹ میں بتایا گیا تھا کہ اسحاق ڈار کی گاڑیاں تحویل میں لینے کے لیے ان کی رہائش گاہ پر کارروائی کی گئی لیکن وہاں گاڑیاں نہیں تھیں جن کی تلاش جاری ہے جبکہ گھر کی ڈی وی آر بھی وصول کی جاچکی ہے۔