آئی ایس آئی کی رپورٹ پر پاکستان کی بڑی کارروائی
واشنگٹن(ملت آن لائن) امریکہ نے پاکستان سے مطالبہ کیا ہے کہ اسلام آباد میں امریکی امداد پر چلنے والی ریڈیو مشعال کی نشریات پر عائد کی جانے والی پابندی ہٹائی جائے۔امریکی ٹی وی کے مطابق امریکی دفتر خارجہ کی ترجمان ہیتھر نوئرٹ نے صحافیوں سے گفتگو کرتے ہوئے کہا کہ 19 جنوری کو پاکستان کی وزرات داخلہ کی جانب سے ریڈیو فری یورپ /ریڈیو فری لیبرٹی کے ریڈیو مشعال پر لگائی جانے والی پابندی کے حکومتی فیصلے پر امریکہ کو تشویش ہے۔ہم نے پاکستانی حکومت کو اپنی تشویش سے آگاہ کیا ہے اور ہم پاکستان سے مطالبہ کرتے ہیں کہ وہ بغیر کسی تاخیر کے ریڈیو مشعال کو بند کرنے کا فیصلہ واپس لے۔واضح رہے کہ وزارتِ داخلہ نے آئی ایس آئی کی رپورٹ کی روشنی میں مشعال ریڈیو کو بند کرنے کا فیصلہ کیا تھا،مشعال ریڈیو ایک پشتو ریڈیو چینل ہے اور امریکہ کی طرف سے فنڈڈ ریڈیو چینل ہے جس کی نشریات یورپ فری سے بھی منسلک ہیں، وزارت داخلہ نے اسلام آباد کے کمشنر اور پولیس چیف کو خط لکھا ہے کہ آئی ایس آئی کی رپورٹ کے مطابق یہ چینل پاکستان مخالف پروپیگنڈا کر رہا ہے اور غیر ملکی انٹیلی جنس ایجنسی کے ایجنڈا پر عمل درآمد کر رہا ہے، بتایا گیا ہے کہ چاراہم موضوعات جو اس کی طرف سے نشر کیے جاتے ہیں ان میں پاکستان کو دہشت گردی کا مرکز بتایا گیا ہے اور کہا گیا ہے کہ یہاں دہشت گردوں کے محفوظ ٹھکانے موجود ہے، اس کے علاوہ یہ بھی کہا جاتا ہے کہ پاکستان اقلیتوں اور پختونوں کو تحفظ دینے میں ناکام رہا ہے اور یہ ریڈیو لوگوں کو ریاست اور اس کے اداروں کے خلاف متحرک کر رہا ہے۔ وزارت داخلہ نے اسلام آباد میں اس ریڈیو کے علاقائی دفتر کو بند کرنے اور اس کی سرگرمیوں کو ختم کرنے کا فیصلہ کیا ہے۔ واضح رہے کہ اس ریڈیو نے 2010 میں فاٹا میں اپنی نشریات کا آغاز کیا اور اسے ریڈیو مشعال کا نام دیا گیا۔ دریں اثناء آن لائن کے مطابق سکیورٹی فورسز نے پاک افغان بارڈر کے قریب ریاست مخالف پروپیگنڈا کرنے والے عمر ایف ایم ریڈیو ٹاور کو تباہ کردیا۔تویٰ طوئی کے قریب امن دسمنوں کی جانب سے نصب کردہ اس ٹاور کے ذریعے ریاست مخالف پروپیگینڈہ نشر کیا جاتا تھا تفصیلات کے مطابق جمعہ کی صبح پاک افغان بارڈر کے قریب سیکورٹی فورسز نے ایک کارروائی کے دوران امن دشمنوں کی جانب سے تویٰ طوئی کے قریب نصب کئے جانے والے عمر ایف ایم ریڈیو کے ٹاور کو تباہ کردیا اس ٹاور کے ذریعے عمر ایف ایم ریڈیو پر ریاست کے خلاف زہریلا پروپیگنڈا نشرکرنے کا سلسلہ جاری تھا اس ریاست مخالف پرو پیگنڈے سے شہریوں کو غلط پیغام دیا جارہا تھا جو ناکام بنا دیا گیا ہے۔