خبرنامہ انٹرنیشنل

کابل (ملت آن لائن + آئی این پی) افغانستان کے صوبہ خوست میں فوجی کیمپ کے قریب خودکش کار بم دھماکہ ہوا ہے جس میں ہلاکتوں کا خدشہ ظاہر کیا جارہا ہے۔پیر کو افغان خبر رساں ادارے’’ خامہ پریس ‘‘کی رپورٹ کے مطابق دھماکا جنوب مشرقی صوبے خوست میں ایک فوجی اڈے کے قریب ہوا۔ابتدائی رپورٹ کے مطابق دھماکا خود کش کار بم کے ذریعے گیا جب کہ وزارت داخلہ نے بھی دھماکے کی تصدیق کردی ہے۔وزارت داخلہ کے ترجمان نجیب دانش نے بتایا کہ دھماکا مقامی وقت کے مطابق تقریبا ایک بجے کے قریب سنا گیا۔انہوں نے کہا کہ تاحال دھماکے سے ہونے والے نقصان سے متعلق اطلاعات موجود نہیں ہیں اور ریسکیو ٹیمیں جائے وقوع کی جانب روانہ ہوگئیں ہیں۔کسی تنظیم کی جانب سے دھماکے کی ذمہ داری قبول نہیں کی گئی ہے۔خیال رہے کہ افغان آرمی چیف جنرل قدم شاہ شاہم اور وزیر دفاع عبداللہ خان حبیبی نے بھی اپنے عہدے سے استعفی دے دیا ہے۔ان دونوں عہدے داروں نے 21 اپریل کو شمالی افغانستان میں صوبہ بلخ کے دارالحکومت مزار شریف کے مضافات میں قائم فوجی اڈے میں ہونے والے طالبان کے حملے میں 100 سے زائد فوجیوں کی ہلاکت کے بعد عہدے سے استعفی دیا۔اس واقعے کے بعد آرمی چیف اور وزیر دفاع پر استعفی دینے کے لیے دبا بڑھ رہا تھا۔