منیلا(آئی این پی )فلپائن اور امریکہ کی مشترکہ فوجی مشقوں میں شریک ایک فلپائنی فوجی اہلکار حادثے کے نتیجے میں ہلاک ہوگیا۔غیر ملکی میڈیا کے مطابق فلپائن کی افواج کی جانب سے جاری ایک بیان میں کہا گیا ہے کہ حادثہ فلپائن کے ساحلی علاقے سیوبک کے ہوائی اڈے کینزدیک جمعرات کو پیش آیا۔بیان کے مطابق مشقوں کے دوران فوجی اہلکار نے دیگر ساتھیوں کے ہمراہ پیراشوٹ باندھ کو جہاز سے چھلانگ لگائی تھی لیکن وہ تیز ہواؤں کے باعث نزدیکی سمندر میں جاگرا۔حکام کے مطابق فلپائن اور امریکہ دونوں کی افواج حادثے کی تحقیقات کر رہی ہیں۔فوجی مشقوں کے لیے امریکی فوج کے نامزد ترجمان کیپٹن ایلکس لِم نے بتایا ہے کہ مشقوں میں شریک تمام اہلکاروں کی حفاظت دونوں ملکوں کی اولین ترجیح ہے جسے ہر صورت یقینی بنایا جائے گا۔ترجمان نے کہا کہ امریکہ اور فلپائن کی مشترکہ فوجی مشقیں ہر سال ہوتی ہیں لیکن اس سے قبل ان میں کسی اہلکار کے ہلاک ہونے کا کوئی واقعہ ان کے علم میں نہیں۔گیارہ روزہ مشقوں کا آغاز پیر کو ہوا تھا جس میں پانچ ہزار سے زائد امریکی جب کہ ساڑھے تین ہزار فلپائنی فوجی اہلکار شریک ہیں۔ مشقیں فلپائن کیکئی علاقوں میں بیک وقت جاری ہیں۔فلپائن اور خطے کے دیگر ملکوں کے بحیرہ جنوبی چین کے جزائر کی ملکیت پر چین کے ساتھ جاری تنازعات کے بعد سے امریکہ نے خطے کے ملکوں کے ساتھ فوجی تعاون میں اضافہ کیا ہے۔امریکہ نے گزشتہ ایک سال کے دوران فلپائن کو 12 کروڑ ڈالر سے زائد کی فوجی امداد دی ہے جس کا مقصد امریکی حکومت کے بقول فلپائن کی سلامتی اور دفاع کو مضبوط بنانا ہے۔امریکی وزیرِ دفاع ایش کارٹر بھی اگلے ہفتے فوجی مشقوں کی اختتامی تقریب میں شرکت کے لیے منیلا کا دورہ کریں گے جہاں وہ فلپائن کی بحری فوج کے لیے مزید چار کروڑ ڈالر سے زائد کے امدادی پیکج کا اعلان کریں گے۔
خبرنامہ انٹرنیشنل
امریکہ اورفلپائن کی مشترکہ فوجی مشقیں،فلپائنی فوجی اہلکار حادثے میں ہلاک
![](http://www.millat.com/wp-content/uploads/2016/04/xfd-1.png)