بھارتی یوم جمہوریہ کے موقع پر پلاسٹک کے ترنگے لہرانے پر پابندی عائد
نئی دہلی:(ملت آن لائن) بھارتی وزارت داخلہ نے رواں برس بھارت کے یوم جمہوریہ کے موقع پر پلاسٹک کے جھنڈوں کی تیاری اور خرید و فروخت پر پابندی عائد کردی۔ بھارتی وزارت داخلہ کی جانب سے تمام ریاستوں کو ہدایات جاری کردی گئی ہیں کہ پلاسٹک کے جھنڈے بنانے اور ان کی خرید و فروخت پر مکمل طور پر پابندی عائد کردی جائے۔ وزارت داخلہ کا کہنا ہے کہ چونکہ پلاسٹک تلف نہیں ہوتا لہٰذا چند دن بعد یہ جھنڈے جابجا زمین پر بکھرے نظر آتے ہیں جس سے ترنگے کی بے حرمتی ہوتی ہے۔ وزارت کی جانب سے پلاسٹک کے ترنگے لہرانے والوں کو قومی پرچم کی بے حرمتی کا مرتکب قرار دیا جائے گا۔ بھارتی آئین کے مطابق ترنگے کی بے حرمتی کرنے والے پر جرمانہ عائد کیا جاسکتا ہے، اسے جیل بھیجا جاسکتا ہے یا دونوں سزائیں لاگو کی جاسکتی ہیں۔ جاری کردہ حکم کے مطابق یوم جمہوریہ کے علاوہ بھی دیگر قومی و ثقافتی مواقعوں پر پلاسٹک کے جھنڈوں سے اجتناب کیا جائے اور ان کی جگہ کاغذ کے بنے جھنڈے استعمال کیے جائیں تاکہ اسے فلیگ کوڈ آف انڈیا 2002 کے تحت بحفاظت تلف کیا جاسکے۔