خبرنامہ انٹرنیشنل

ترکی میں طیارہ گر کر تباہ، عملہ اور مسافر محفوظ

انقرہ :(ملت آن لائن) پیگاسس ایئرلائنز طیارہ ساحل کے قریب گر کر تباہ ہوگیا تاہم خوش قسمتی سے تمام مسافر اور عملہ محفوظ رہا۔ پیگاسس ایئرلائنز کی پرواز ترکی کے ساحل سمندر کے نزدیک واقع ٹبرازون ایئر پورٹ کے رن وے سے کچھ فاصلے پر نامعلوم وجوہات کی بناء پر زمین پر آن گرا۔ پیگاسس ایئرلائنز کی انتظامیہ کے مطابق مذکورہ حادثہ ہفتے کی شب ٹراب زون ایئرپورٹ پر پیش آیا جب بوئنگ ایئر کرافٹ 737-800 انقرہ سے ٹرابزون ایئرپورٹ پر پہنچا لیکن لینڈنگ درست نہ ہونے کے سبب ساحل سمندر کے بالکل نزدیک زمین پر گر گیا۔ ایئرپورٹ انتظامیہ کے مطابق افسوسناک واقعے کا خوش قسمت پہلو یہ ہے کہ جہاز کے عملے سمیت تمام مسافر محفوظ رہے تاہم طیارے کو کافی نقصان پہنچا ہے، طیارے میں 162 مسافر سوار تھے۔ حادثے کے بعد سیکیورٹی اہلکاروں نے جائے وقوعہ کو گھیرے میں لے لیا جب کہ طیارے کے عملے اور مسافروں کو محفوظ مقام پر منتقل کردیا گیا ہے جب کہ چند معمولی زخمی افراد کو فوری طبی امداد فراہم کرنے کے بعد گھر جانے کی اجازت دے دی گئی ہے۔ حادثہ ٹرابزون ایئرپورٹ پر برف باری کے باعث پیش آیا جہاں طیارہ لینڈنگ کے دوران برف کی وجہ سے پھسل کر رن وے سے اتر کر ساحلی زمین پر چلا گیا اور خدشہ تھا کہ سمندر میں گر جاتا تاہم خوش قسمتی سے طیارہ کچگ فاصلے پر ہی زمین میں دھنس گیا اورسمندر کی لہروں سے محفوظ رہا. ایئرپورٹ انتظامیہ کا کہنا ہے کہ واقعہ کی تحقیقات کے لیے کمیٹی تشکیل دے دی گئی ہے جو ایک ماہ میں اپنی رپورٹ پیش کرے گی جس کی روشنی میں ذمہ داروں کے خلاف سخت تادیبی کارروائی کی جائے گی۔