خبرنامہ انٹرنیشنل

برلن(آئی این پی)جرمنی کے شہر میونخ کے شاپنگ مال میں حملہ کرنے والے شخص کی شناخت ہوگئی ،حملہ آور ایرانی نژاد جرمن شہری نکلا۔جرمن میڈیا کے مطابق گزشتہ روز جنوبی جرمن شہر میونخ کے ایک شاپنگ مال میں حملہ کرنے والے شخص کی شناخت ایک ایرانی نژاد جرمن کے طور پر کی گئی ہے۔ اس واقعے میں نو افراد ہلاک ہوئے۔ میونخ پولیس کا کہنا ہے کہ دوہری شہریت کے حامل اس نوجوان کی لاش بعد میں جائے واقعہ سے ایک کلومیٹر دور ایک مقام پر سے ملی۔ پولیس کے مطابق ممکنہ طور پر اس نوجوان نے خود کو گولی مار کر ہلاک کیا۔ مقامی پولیس کے مطابق فی الحال یہ کہنا قبل از وقت ہو گا کہ آیا اس حملے کے درپردہ مسلم شدت پسندی کا عنصر تھا یا نہیں۔ ہفتے کو اس واقعے کے جائزہ لینے کے لیے جرمن چانسلر انگیلا میرکل وزیرداخلہ تھوماس ڈے میزیئر سے ملاقات کر رہی ہیں۔