خبرنامہ انٹرنیشنل

سوچی:(ملت+اے پی پی) روس کے فوجی اہلکاروں، صحافیوں اور دیگر لوگوں کو شام لے جانے والا فوجی طیارہ بحراسود میں گر کر تباہ ہوگیا جس کے نتیجے میں طیارے میں سوار تمام 92 افراد ہلاک ہوگئے۔ روسی فوجی طیارہ فوجی طیارے ٹی یو 154 نے سوچی کے ایئرپورٹ ایدلر سے اڑان بھری ہی تھی کہ 2 منٹ بعد راڈار سے غائب ہوگیا اور بحر اسود میں جاگرا۔ طیارے میں فوجی اہلکاروں کے علاوہ 9 صحافی اور نامور ملٹری بینڈ کے 64 افراد شامل تھے جنہیں شام میں سال نو کے موقع پر روسی فوجیوں کو تفریح فراہم کرنے کے لئے لے جایا جا رہا تھا۔ طیارہ ماسکو سے سوچی کے ایدلر ایئرپورٹ پرایندھن بھرانے کے لئے اترا تھا جہاں سے دوبارہ پرواز بھرنے کے بعد ڈیڑھ کلو میٹر دوری پر بحراسود میں گرگیا۔ وزارت دفاع کا کہنا تھا کہ طیارے کے ریڈار سے غائب ہونے کے فوری بعد امدادی کارروائیاں شروع کردی گئی تھیں تاہم حادثے میں کسی کے زندہ بچنے کا کوئی امکان نہیں اور اب تک 14 لاشوں کو سمندر سے نکالا جاچکا ہے جب کہ دیگر لاشیں نکالنے کے لئے آپریشن جاری ہے۔ روسی صدر ولادی میرپیوتن نے طیارہ حادثے پر گہرے دکھ اور افسوس کا اظہار کرتے ہوئے واقعے کی تحقیقات کا حکم دے دیا اور کل ملک بھر میں سوگ منانے کا اعلان کیا ہے۔ روس گزشتہ برس سے شام میں بشار الاسد کی حکومت کو داعش کے خلاف فوجی تعاون فراہم کررہا ہے.