سعودی عرب کے شہر جدہ میں خواتین کے لئے کار شو کا اہتمام
لاہور: (ملت آن لائن) سعودی عرب میں خواتین کو گاڑی چلانے کی اجازت ملنے کے بعد ایک اور قدم، جدہ میں ایک کار شو منعقد کیا گیا جو صرف خواتین کے لئے مخصوص تھا۔ اسی مناسبت سے ہال کو پنک، نارنجی اور پیلے غباروں سے سجایا گیا تھا۔ شو میں آئی خواتین نے اپنی پسند کے ماڈلز دیکھے، کسی نے ڈرائیونگ سیٹ پر بیٹھ کر اور کسی نے سیلفی بنا کر کار شو میں شرکت کی، خواتین کی مدد کے لئے خواتین ہی گائیڈ تھیں، شو میں مستقبل کی فیول ایفیشنٹ گاڑیاں توجہ کا مرکز رہیں۔ سعودی عرب کے فرمانروا شاہ سلمان نے گزشتہ برس ستمبر میں خواتین کو ڈرائیونگ کی اجازت دی تھی اور رواں برس جون تک یہ پابندی مکمل طور پر اٹھا لی جائے گی۔
………………………………….
اس خبر کو بھی پڑھیے…پاکستان کو تکلیف کا احساس دلانا ہماری پالیسی ہے، بھارتی آرمی چیف
نئی دہلی:(ملت آن لائن) بھارتی آرمی چیف نے کہا ہے کہ پاکستان کو تکلیف کا احساس دلاتے رہنا ہماری پالیسی ہے۔ نئی دہلی میں سالانہ پریس کانفرنس سے خطاب کرتے ہوئے بھارتی آرمی چیف جنرل بپن راوت نے کہا کہ چین طاقتور ملک ہے اور بھارتی سرحدوں پر دباؤ بڑھا رہا ہے لیکن بھارت بھی کمزور نہیں، سرحد پر چین سے خطرات کا سامنا ہے لیکن بھارتی فوج کسی بھی چینی جارحیت کا مقابلہ کرنے کی صلاحیت رکھتی ہے اور وقت آگیا ہے کہ وہ اپنی توجہ شمالی سرحد پر مرکوز کرے۔ چین اور پاکستان سے اکٹھے جنگ ہو سکتی ہے، بھارتی آرمی چیف، امریکا کی پاکستان کو دھمکیوں سے متعلق سوال کے جواب میں بھارتی آرمی چیف نے کہا کہ بھارت کو دیکھو اور انتظار کرو والی پالیسی اپنانی ہوگی، پاکستان دہشت گردوں کو ٹشو پیپر کے طور پر استعمال کرکے پھینک دیتا ہے لیکن بھارتی فوج نے ہمیشہ اس بات کو یقینی بنایا کہ پاکستان کو بھی تکلیف کا احساس دلایا جاتا رہے۔ انہوں نے کہا کہ جوہری ، کیمیائی، حیاتیاتی اور تابکار ہتھیاروں کے استعمال کی دھمکی اب حقیقت کا روپ دھار چکی ہے، آئندہ جنگ جیتنے کے لیے فوج کو جدید ہتھیاروں سے لیس کرنا ہوگا۔ جنرل بپن راوت نے بتایا کہ اس سال مقبوضہ کشمیر کے شمالی علاقوں میں آپریشن پر زیادہ توجہ دی جائے گی، 2017 میں بھارتی فوج نے جنوبی کشمیر میں زیادہ آپریشن کیے اور اس سال شمالی کشمیر کے علاقوں بارہ مولا، پٹن، ہنڈوارہ، کپواڑہ، سوپور، لولاب اور بانڈی پورا میں زیادہ فوجی آپریشن کیے جائیں گے۔ جنرل بپن راوت نے خطے میں چین کے بڑھتے اثر و رسوخ کے حوالے سے کہا کہ بھارت اپنے پڑوسی ممالک کو چین کے زیر اثر نہیں جانے دے گا۔