خبرنامہ انٹرنیشنل

شام میں فائربندی کے بہت بہتر نتائج برآمد ہوئے، ترک وزیر خارجہ

انقرہ (ملت آن لائن) ترک وزیر خارجہ مولود چاوش اولو نے کہا ہے کہ انقرہ حکومت کی جانب سے روس اور ایران کے ساتھ مل کر شام میں فائربندی کے حوالے سے کیے گئے اقدامات کے بہت بہتر نتائج برآمد ہوئے ہیں۔ جرمن خبر رساں ادارے ڈی پی اے کو دیئے گئے ایک انٹرویو میں چاوش اولو نے کہا کہ شام میں سلامتی کی صورت حال میں گزشتہ ایک برس میں ڈرامائی بہتری پیدا ہوئی ہے۔ انہوں نے کہا کہ اگر شام میں خانہ جنگی دوبارہ شدت پکڑتی ہے، تو اس سے مہاجرین کا نیا بہاؤ ترکی کا رخ کرے گا، جس کا لازمی دباؤ یورپ پر بھی پڑے گا۔ چاوش اولو نے کہا کہ روس سے اختلافات کے باوجود شام میں قیام امن کی کوششیں جاری رہیں گی۔ انہوں نے ایک مرتبہ پھر انقرہ حکومت کے موقف کو دہرایا کہ صدر اسد کو اقتدار سے الگ ہو جانا چاہیے۔

………………….

اس خبرکو بھی پڑھیے…دمشق کے مضافات میں شدید لڑائی اور فضائی حملے

دمشق(ملت آن لائن) دمشق میں افواج اور باغیوں کے درمیان شدید جھڑپیں ہوئیں۔امریکی خبررساں ادارے کے مطابق القاعدہ سے وابستہ عسکریت پسندوں کے ہمراہ باغیوں نے فوج پر دھاوا بول دیاجس کے نتیجے میں فوجی تنصیب کے کچھ حصوں اور اندر پھنس کر رہ جانے والی فورس کے گرد گھیرا تنگ کر دیا۔برطانیہ میں قائم سیرئن آبزرویٹری فور ہیومن رائٹس‘ کے سرگرم کارکن، مازن الشامی نے بتایا ہے یہ لڑائی حرستا کے مضافات کے نزدیک واقع فوجی تنصیب کے اندر لڑی جاتی رہی، جہاں سرکاری فوج پھنس کر رہ گئی تھی۔آبزرویٹری نے کہا ہے کہ شامی فضائی فوج نے حرستا کے قرب و جوار میں کم از کم ایک درجن فضائی حملے کیے۔اْنھوں نے کہا ہے کہ حکومت نے رات گئے اضافی کمک پہنچائی جس نے گھیرے میں پھنسنے والی فوج کی مدد کی۔دمشق کے مضافات میں مشرقی غوطا کے قرب و جوار میں تشدد کی کارروائیاں جاری رہیں، جس دوران 35 شہریوں کے ساتھ ساتھ فوج کے 24 اہل کار اور 29 باغی ہلاک ہوئے۔انتہائی قدامت پسند، ’الاحرار الشام‘ باغی گروپ سے وابستہ ایک اہل کار نے کہا ہے کہ فوجی تنصیب کے اندر پھنس کر رہ جانے والے اْس کے لڑاکوں کو محفوظ گزرگاہ دینے کے بارے میں مذاکرات جاری ہیں۔اہل کار، جنھوں نے مذاکرات کی رازداری کے پیش نظر اپنا نام ظاہر نہیں کیا، بتایا ہے کہ یہ بات چیت ابھی ابتدائی مرحلے میں ہے۔