فرانسیسی صدر کی ممکنہ معاشی اصلاحات کیخلاف ملک گیر احتجاج
پیرس: (ملت آن لائن) فرانسیسی صدر میکرون کی ممکنہ معاشی اصلاحات کے خلاف ملک بھر میں احتجاج، کئی شہروں میں پُرتشدد مظاہرے پھوٹ پڑے، پولیس کے ساتھ جھڑپوں میں درجنوں مظاہرین زخمی ہو گئے۔
صدر میکرون کی ممکنہ معاشی اصلاحات کو نامنظور قرار دیتے ہوئے پیرس اور دیگر شہروں میں ورکرز یونین کے ہزاروں کارکنان سڑکوں پر نکل آئے۔ پرتشدد مظاہروں سے پیرس کی سڑکیں میدان جنگ کا منظر پیش کرنے لگیں۔ پولیس نے مظاہرین کے خلاف آنسو گیس اور پانی کی توپوں کو بے دریغ استعمال کیا۔
ائیرپورٹس ورکرز کی ہڑتال کے باعث پیرس کی 30 فیصد پروازیں منسوخ ہو گئیں جبکہ 60 فیصد ریلوے سروس بھی معطل رہی۔ ملک گیر احتجاج کے باعث بڑے شہروں میں کاروباری مراکز بھی بند رہے۔
………………..
اس خبر کو بھی پڑھیے…برطانوی وزیر خارجہ نے پیوٹن کو ہٹلر سے تشبیہ دیدی
لندن(ملت آن لائن) پیوٹن ملکی ساکھ بہتر بنانے کیلئے فٹبال ورلڈکپ کا استعمال کر رہے ہیں، بورس جانسن کا پارلیمنٹ میں خطاب برطانوی وزیر خارجہ بورس جانسن نے روس کے صدر ولادی میر پیوٹن کو ہٹلر سے تشبیہ دے دی ہے۔غیر ملکی میڈیا رپورٹس کے مطابق برطانوی ارکان پارلیمنٹ کے سوالوں کے جواب میں وزیر خارجہ جانسن نے روسی صدر کا جرمنی کے ہٹلر سے موازنہ کرتے ہوئے کہا کہ جس طرح ہٹلر نے اولمپکس کو استعمال کیا تھا اسی طرح پیوٹن بھی فٹبال ورلڈ کپ کو استعمال کر رہے ہیں۔
انہوں نے کہا کہ روسی صدر فیفا ورلڈکپ کی میزبانی کے ذریعے اپنے ملک کا مقام اونچا کرنے کی کوشش کر رہے ہیں، یہ ایسا ہی ہے جیسا ہٹلر نے نازی جرمنی میں اولمپکس کی میزبانی کرکے اپنی ساکھ بہتر بنانے کی کوشش کی تھی۔ ماسکو کا ورلڈکپ کی میزبانی کو کردارسازی کے لیے استعمال کرنے کا موازنہ 1936میں ہونے والے اولمپکس سے کرنا بالکل درست ہے۔