لالو پرساد یادیو کی سزا کا سن کر اکلوتی بہن چل بسیں
پٹنہ:(ملت آن لائن) بھارتی ریاست بہار کے سابق وزیر اعلیٰ لالو پرساد یادیو کو جیل بھیجے جانے کی خبر سن کر ان کی اکلوتی بہن دل کا دورہ پڑنے سے چل بسیں۔ راشٹریہ جنتا دل (آر جے ڈی) کے صدر و سابق وزیر اعلیٰ بہار لالو پرسا یادیو کی اکلوتی اور بڑی بہن گنگوتری دیوی کافی عرصے سے علیل تھیں جب انہیں لالو پرساد یادیو کی گرفتاری اور سزا کی خبر دی گئی تو انہیں دل کا دورہ پڑ گیا، گنگوتری دیوی کو فوری طور پر اسپتال منتقل کیا گیا تاہم وہ جانبر نہ ہوسکیں۔
یہ پڑھیں: بھارتی ریاست بہار کے سابق وزیر اعلیٰ لالو پرشاد یادیو کوساڑھے 3 سال قید لالو پرساد یادیو کی اہلیہ اور سابق وزیر اعلیٰ بہار رابڑی دیوی نے بتایا کہ گنگوتری دیوی کی طبیعت پہلے سے ہی خراب تھی وہ اپنے بھائی کی رہائی کے لیے صبح سے ہی دعائیں کررہی تھیں تاہم جیسے ہی انہیں اطلاع ملی کہ بھائی کو جیل بھیج دیا گیا ہے ان کی حالت خراب ہوگئی اور وہ انتقال کرگئیں۔ خیال رہے کہ بھارتی عدالت نے ریاست بہار کے سابق وزیر اعلیٰ لالو پرساد یادیو کو چارہ اسکینڈل سے متعلق دوسرے مقدمے میں ساڑھے 3 سال قید اور 10 لاکھ روپے جرمانے کی سزا سنائی ہے۔