شنگھائی:(ملت آن لائن) چینی صدرشی جن پنگ کا کہنا ہے کہ چین دیگرممالک کے ساتھ تجارتی فرق ختم کرنا چاہتا ہے، تمام ممالک کے لیے چین کے دروازے مزید وسیع کیے جائیں گے۔
تفصیلات کے مطابق شنگھائی میں درآمدی نمائش کی افتتاحی تقریب سے خطاب کرتے ہوئے چینی صدر شی جن پنگ نے کہا کہ ڈیجیٹل ٹیکنالوجی ، مصنوعی ذہانت سے دنیا میں انقلاب برپا ہوا۔
شی جن پنگ نے کہا کہ گلوبلائزیشن نے جنگل کے قانون کا خاتمہ کردیا ہے، دنیا بھر کے ممالک کو مشترکہ چیلنجز اورخطرات کا سامنا ہے۔
چینی صدر کا کہنا تھا کہ چین دیگر ممالک کے ساتھ تجارتی فرق ختم کرنا چاہتا ہے، تمام ممالک کے لیے چین کے دروازے مزید وسیع کیے جائیں گے۔
شی جن پنگ کا یہ بھی کہنا ہے کہ تجارت اورسرمایہ کاری کے مواقع کو مزید وسعت دی جائے گی، درآمدات بڑھا کرعالمی برادری سے تعلقات مزید مستحکم کرنا چاہتے ہیں۔
یاد رہے کہ رواں سال 10 اپریل کو چین کے صدر شی جنگ پنگ نے باؤ فورم سے خطاب کرتے ہوئے کہا تھا کہ چین عالمی برادری کے ساتھ مل کرترقی کےعمل کو تیز کررہا ہے، ہم زمینی حقائق اور گلوبل وژن کو ایک ساتھ لے کرچل رہے ہیں۔
شی جنگ پنگ کا کہنا تھا کہ چینی عوام نے ملکی ترقی کے لیے غیرمعمولی خدمات سرانجام دیں جس کے باعث چین کا جی ڈی پی 9.5 فیصد تک پہنچ چکا ہے۔