سرینگر :(اے پی پی) مقبوضہ کشمیر میں دختران ملت کی سربراہ آسیہ اندرابی نے اقوام متحدہ کے سیکریٹری جنرل بان کی مون پر زور دیا ہے کہ وہ جموں وکشمیر میں عالمی ادارے کی قراردادوں پر عملدرآمد کے لیے بھارت پر دباؤ ڈالیں۔ کشمیر میڈیا سروس کے مطابق آسیہ اندرابی نے سرینگر سے جاری ایک بیان میں بان کی مو ن کوہدف تنقید بناتے ہوئے کہا کہ انسانی حقوق کی خلاف ورزی کا رونا رونے کے بجائے وہ کشمیری عوام کو ان کا حق ، حق خوداریت دلانے کے لیے بھارت کو آمادہ کریں۔ انہوں نے کہاکہ بان کی مون نے مسئلہ کشمیر کے بارے میں کچھ بیانات ضرور دیے ہیں لیکن انہیں اپنی ذمہ داریوں کا احساس کرتے ہوئے اس عالمی فورم کی طرف سے جموں و کشمیر کے لوگوں سے کئے گئے وعدوں کو پورا کرنے کی کوشش کرنی چاہئے۔انہوں نے کہا کہ بان کی مون ایک ایسے ادارے کے سربراہ ہیں جس نے مسئلہ کشمیر کے بارے میں 18 قراردادیں پاس کرکے اسے حل طلب معاملہ قرار دیا ہے۔ انہوں نے کہا کہ مسئلہ کشمیر کو صرف انسانی حقوق کی خلاف ورزی کا معاملہ قراردینا اس ادارے کی قراردادوں کی نفی ہے۔ آسیہ اندرابی نے کہاکہ بھارت نے کشمیری عوام پر ظلم وجبر کی تمام حدیں پار کردی ہیں اور کشمیر جنت بے نظیر اندھوں کی بستی بنتی جارہی ہے اور بھارتی افواج ہمارے گھروں میں گھس کر قتل وغارت کررہی ہیں۔انہوں نے اسلامی تعاون تنظیم کے سیکریٹری جنرل ایاد امین مدنی کے بیان پر اطمینان کا اظہار کرتے ہوئے ان پر زور دیا کہ وہ مسئلہ کشمیر حل کرنے میں اپنا اثرورسوخ استعمال کریں۔
خبرنامہ کشمیر
بان کی مون مسئلہ کشمیر حل کرنےکےلیےبھارت پردباؤ ڈالیں،آسیہ اندرابی
![](http://www.millat.com/wp-content/uploads/2016/08/asiya.jpg)