جموں میں بھارتی فوجی کیمپ پر حملے میں ہلاک ہونیوالوں کی تعداد بڑھ کر دس ہوگئی
سرینگر(ملت آن لائن) مقبوضہ کشمیرمیں بھارتی فوج نے کہاہے کہ جموں میں سنجوان فوجی کیمپ میں تلاشی کے دوران ایک اور بھارتی فوجی کی لاش ملنے سے حملے میں ہلاک ہونیوالوں کی تعدادبڑھ کر دس ہوگئی ہے ۔ کشمیرمیڈیاسروس کے مطابق ہلاک ہونیوالے چھٹے فوجی لاش پیر کی شب تلاشی کی کارروائی کے دوران ملی جس سے ہفتہ کے روز شروع ہونیوالے حملے میں ہلاک ہونیوالوں کی تعداد بڑھ کر دس ہو گئی ہے جن میں چھ فوجی اور تین حملہ آور بھی شامل ہیں۔ اسلحہ سے لیس حملہ آور دس فروری کو دستی بموں کے دھماکے اور فائرنگ کرتے ہوئے سنجوان فوجی کیمپ میں داخل ہو گئے تھے ۔ منگل کو جموں کے علاقے ڈومانہ میں بھارتی فوج کے ایک اور کیمپ پر حملہ کیاگیا ۔ اطلاعات کے مطابق موٹر سائیکل پر سوار حملہ آوروں نے علاقے میں قائم فوجی کیمپ کے داخلی گیٹ پر فائرنگ کر کے کیمپ میں داخل ہونے کی کوشش کی ۔ واقعے کے بعد بھارتی فوجیوں اور پولیس اہلکاروں نے علاقے میں تلاشی کی بڑی کارروائی شروع کی ۔ دریں اثناء سرینگر کے علاقے کرن نگر میں گزشتہ روز حملہ آوروں اور بھارتی فورسز کے درمیان شروع ہونیوالی جھڑپ منگل کو بھی جاری رہی ۔ پولیس کے مطابق دو حملہ آور کرن نگر میں ایک زیر تعمیر عمارت میں موجو دہیں جو قریبی سی آر پی ایف کیمپ پر حملہ کرنا چاہتے تھے ۔ کٹھ پتلی انتظامیہ نے کشمیری نوجوانون کو احتجاجی مظاہرے کرنے سے روکنے کیلئے متعد د علاقوں میں سخت پابندیاں نافذ کر رکھی ہیں۔ انتظامیہ نے سرینگرشہر میں انٹرنیٹ سروس بھی معطل کر دی ہے۔ اب تک جھڑپ میں بھارتی سینٹرل ریزروپولیس فورس کے دو اہلکار ہلاک اور دو زخمی ہو گئے ہیں۔