سرینگر ۔ 07 نومبر (ملت + اے پی پی) مقبوضہ کشمیر میں میرواعظ عمرفاروق کی زیرقیادت حریت فورم نے کہا ہے کہ جموں وکشمیر میں عوامی تحریک کو فوجی قوت سے کچلنے کیلئے بھارتی فورسز کی پر تشدد کاروائیاں مسلسل جاری ہیں۔ کشمیرمیڈیا سروس کے مطابق فورم کے ترجمان نے سرینگر سے جاری ایک بیان میں سرینگر کے علاقے رعناواری میں بھارتی فورسز اور پولیس کی طرف سے مظفر احمد کے گھرپر چھاپے کے دوران ان کی اہلیہ کو گرفتار کرنے اور خواتین کے پرامن جلوس پر طاقت کے وحشیانہ استعمال کی شدید مذمت کی۔ ترجمان نے کہا کہ شالیمار کے کمسن طالب علم قیصر حمید کے جلوس جنازہ پرشیلنگ اور پیلٹ کا بے انتہا استعمال اسی طرح کی کارروائی ہے جہاں سوگوار وں نے زبر دست عزم اور حوصلے کا مظاہرہ کرتے ہوئے پھر بھی میت کوقبرستان تک پہنچایا۔ انہوں نے زینہ کوٹ مصطفی آباد ، ایچ ایم ٹی ،مازہامہ کانہامہ ، تاپر پٹن، بونہ گام قاضی گنڈ اور کشمیر کے دیگر علاقوں میں پْر امن مظاہرین پر طاقت کے وحشیانہ استعمال ، مکینوں پر تشدد اور توڑ پھوڑکی مذمت کرتے ہوئے کہا کہ ایسی ظالمانہ کارروائیاں ناقابل برداشت ہیں۔ انہوں نے کٹھ پتلی حکومت کی جانب سے سرکاری ملازمین کی برطرفی اور خواتین اساتذہ کو سکولوں کی عمارتوں کی حفاظت کیلئے چوکیداری پر مامورکرنے کی پالیسیوں کو بدترین آمریت قرار دیا۔
خبرنامہ کشمیر
حریت فورم کی پر امن مظاہرین کے خلاف طاقت کے وحشیانہ استعمال
![](http://www.millat.com/wp-content/uploads/2016/05/india-making-kashmir-institutions-redundant-mirwaiz-1463027889-3654.jpg)