غیر قانونی طو رپر نظر بند تما م کشمیریوں کو رہا کیا جائے، میرواعظ
سرینگر:(ملت آن لائن)مقبوضہ کشمیر میں حریت فورم کے چیئرمین میر واعظ عمر فاروق نے پتھراؤ کے الزام میں گرفتار کشمیری نوجوانوں کے مقدمات واپس لینے کے کٹھ پتلی انتظامیہ کے اعلان کو محض ایک نمائشی اقدام قرار دیتے ہوئے حریت رہنماؤں اور کارکنوں سمیت غیر قانونی طور پر نظر بند تمام کشمیریوں کی فوری رہائی کا مطالبہ کیا۔ کشمیر میڈیاسروس کے مطابق میر واعظ عمر فاروق نے سرینگر میں ایک عوامی اجتماع سے خطاب کرتے ہوئے کہا کہ پتھراؤ کی پاداش میں گرفتار نوجوانوں کے خلاف درج مقدمات واپس لینے کا اعلان طفل تسلی کے سوا کچھ نہیں اور ستم ظریفی یہ ہے کہ اس اعلان کے ساتھ ہی اسلام آباد میں جسمانی طو ر پر معذور ایک رکشہ ڈرائیور پر کالا قانون پبلک سیفٹی ایکٹ لاگو کر کے اسے جموں خطے کی کٹوعہ جیل میں منتقل کیا گیا۔ میر واعظ نے کہا کہ اس وقت ہزاروں کشمیری مقبوضہ علاقے اور بھارت کی مختلف جیلوں میں محض اپنے سیاسی نظر یات کی بنیا پر برسہابرس سے نظر بند ہیں جنہیں جسمانی اور ذہنی اذیتوں سے گزارا جا تا ہے۔ انہوں نے کہا کہ نظر بندوں کو طبی سمیت تمام بنیادی سہولیات سے محروم رکھا جا رہا ہے۔ میر واعظ عمر فاروق نے کہا کہ اگر کٹھ پتلی انتظامیہ واقعی سنجیدہ اور مخلص ہے تو سب سے پہلے جیلوں ، تھانوں اور تفتیشی مراکز میں بند کشمیری سیاسی نظر بندوں کو رہا اور آرمڈ فورسز سپیشل پاورز ایکٹ ، پبلک سیفٹی ایکٹ اور دیگر کالے قوانین کو منسوخ کرے۔انہوں نے کہا کہ کشمیری نوجوان دیرینہ حل طلب تنازعہ کشمیر کی وجہ سے سڑکوں پر آرہے ہیں اور جب تک اس مسئلے کو کشمیریوں کی خواہشات اور جذبات کے مطابق منصفانہ طریقے سے حل نہیں کیا جاتا ، اس وقت تک یہاں کے حالات ٹھیک نہیں ہونگے۔
خبرنامہ کشمیر
غیر قانونی طو رپر نظر بند تما م کشمیریوں کو رہا کیا جائے، میرواعظ
![](http://www.millat.com/wp-content/uploads/2017/01/698459-MirwaizumarfarooqAPP-1483394107-998-640x480.jpg)