چارسدہ : طالب علم نے پرنسپل کو گولی مارکر قتل کردیا
چارسدہ :(ملت آن لائن) شبقدر میں سیکنڈ ائیر کے طالب علم نے توہین رسالت کا الزام لگا کر پرنسپل کو قتل کردیا، پولیس اہلکاروں نے ملزم کو آلہ قتل سمیت گرفتارکر کے مقدمہ درج کرلیا۔ چارسدہ کی تحصیل شبقدر میں مٹہ روڈ پر واقع نیو اسلامیہ کالج کے سیکنڈ ایئر کے طالب علم فہیم اشرف نے پیر کی صبح پرنسپل سریراحمد پر توہین رسالت کا الزام عائد کرکے ان پر اندھا دھند فائرنگ کردی۔ گولیاں لگنے سے سریر احمد شدید زخمی ہوگئے، جنہیں فوری طور پر مقامی اسپتال منتقل کیا گیا تاہم وہ زخموں کی تاب نہ لاتے ہوئے دوران علاج جاں بحق ہوگئے، مقتول کو سر اور سینے میں گولیاں ماری گئیں۔ واردات کے بعد ملزم نعرے لگا رہا تھا کہ اس نے توہین رسالت کے مرتکب کو انجام تک پہنچادیا ہے، پرنسپل کے قتل کیخلاف مشتعل طلبہ اور عوام سڑکوں پر نکل آئے اور شدید نعرے بازی کی، مظاہرے کے دوران اہم شاہراہ پر ٹریفک جام ہوگیا۔ اس حوالے سے ذرائع کا کہنا ہے کہ ملزم فہیم اشرف تحریک لبیک یارسول اللہ کے اسلام آباد دھرنے میں شرکت کیلئے کلاس سے غیرحاضر رہا تھا، جس پر پرنسپل نے اس کی سرزنش کی جس پر وہ مشتعل ہوگیا، شبقدر تھانے کی پولیس نے ملزم کو جائے وقوعہ سے گرفتار کرکے آلہ قتل برآمد کرکے ایف آئی آر درج کرلی گئی ہے۔