ارباب عالمگیر، عاصمہ اور رئیسانی کیخلاف تحقیقات جلد مکمل ہونگی، چیرمین نیب
لاہور(ملت آن لائن)قومی احتساب بیورو (نیب) کے چیرمین جسٹس ریٹائرڈ جاوید اقبال نے کہا ہے کہ ارباب عالمگیر، عاصمہ ارباب اور اسلم رئیسانی کیخلاف تحقیقات جلد مکمل کی جائیں گی۔
چیئرمین نیب جسٹس ریٹائرڈ جاوید اقبال نے کہا ہے کہ پیپلز پارٹی کے سابق وفاقی وزیر ارباب عالمگیر، ان کی اہلیہ و سابق رکن قومی اسمبلی عاصمہ ارباب اور سابق وزیراعلیٰ بلوچستان اسلم رئیسانی کیخلاف تحقیقات جلد مکمل کی جائیں گی۔ ملزمان کیخلاف آمدن سے زائد غیرقانونی اثاثے بنانے اور گوادر میں زمینوں کی ناجائز الاٹمنٹس کے الزامات ہیں۔
جسٹس ریٹائرڈ جاوید اقبال نے کہا کہ بدعنوانی کا خاتمہ میری اولین ترجیح ہے، کرپشن کے خلاف زیرو ٹالرنس کی پالیسی پر سختی سے عملدرآمد کیا جائے گا اور تمام نیب تحقیقات کو قانون و ٹھوس شواہد کی بنا پر جلد پایہ تکمیل تک پہنچا دیا جائے گا۔
فیڈرل بورڈ آف ریونیو (ایف بی آر) نے کہا ہے کہ پیراڈائز لیکس میں جس پاکستانی کا بھی نام آیا ہے اس کے خلاف تحقیقات ہوگی۔
ترجمان ایف بی آر کے مطابق پیراڈائز لیکس کا جائزہ لیا جارہا ہے جس میں ایک لمبی فہرست ہے، پیرا ڈائز لیکس میں آنے والے پاکستانیوں کے ناموں کا جائزہ لے رہے ہیں۔
ترجمان کا کہنا ہے کہ پیراڈائز لیکس میں آنے والے پاکستانیوں کو نوٹس جاری کریں گے تاہم فی الحال ایسے لوگوں کے ناموں کا جائزہ لے رہے ہیں۔