خبرنامہ پاکستان

اسلام آباد:(اے پی پی) وفاقی وزیرخزانہ اسحاق ڈار نے اپوزیشن لیڈرخورشید شاہ سے ملاقات کی جس میں ٹی اوآرز سمیت متعدد امور پرگفتگو ہوئی ہے۔ وزیراعظم نوازشریف کی ہدایت پروفاقی وزیرخزانہ اسحاق ڈارنےپیپلز پارٹی رہنماء اوراپوزیشن لیڈرخورشید شاہ سے ملاقات کی ہے، وزیراعظم نے ہدایت کی تھی کہ ٹی اوآرز پر مفاہمت کے لیے ایک اور کوشش کی جائے۔ ملاقات میں الیکشن کمیشن کےارکان کی تقرری کے معماملے پربات ہوئی، پنامہ پیپرز کی تحقیقات کے لیے ٹی او آرز پر حکومت اوراپوزیشن کے درمیان مفاہمت کا معاملہ زیرِ بحث آیا اوردیگر اہم موضوعات پر بھی گفتگو ہوئی۔ ملاقات کے دوران اپوزیشن لیڈرخورشید شاہ نےاسحاق ڈارسے وزیراعظم کی خیریت دریافت کی، جس کے جواب میں وفاقی وزیر نے اطلاع دی کہ ’وزیراعظم اب پہلے سے بہتر ہیں‘۔ گزشتہ روز وزیراعظم کی زیرصدارت ایک اہم اجلاس منعقد ہوا تھا جس میں وفاقی وزراء کو اپوزیشن کے ساتھ معاملات مفاہمت کے ساتھ سلجھانے کی ہدایت کی گئی تھی۔