خبرنامہ پاکستان

پشاور:(اے پی پی) صوبائی الیکشن کمیشن نے تحریک انصاف کے چئیرمین عمران خان کو حلقہ پی کے 8 میں جلسہ کرنے پر نوٹس جاری کردیا جب کہ مولانا فضل الرحمان کو نوٹس جاری کرتے ہوئے تنبیہ کی گئی ہے کہ حلقے میں جلسہ نہ کیا جائے ورنہ قانونی کارروائی کی جائے گی ۔ پشاور کے حلقہ پی کے 8 میں آج تحریک انصاف کی جانب سے جلسے کے اعلان پر ریجنل الیکشن کمشنرنے تحریک انصاف کے چیرمین عمران خان کو نوٹس جاری کرتے ہوئے کہا ہے کہ ضمنی انتخابات میں بڑے جلسے کرنا انتخابی قوانین کی کھلی خلاف ورزی ہے۔ صوبائی الیکشن کمیشن نے جمعیت علمائے اسلام (ف) کے سربراہ مولانا فضل الرحمان کوبھی حلقہ پی کے 8 میں جلسہ کرنے سے منع کرتے ہوئے نوٹس جاری کردیا، الیکشن کمیشن کی جانب سے جاری بیان میں کہا گیا ہے کہ اگرمولانا فضل الرحمان نے ضابطہ اخلاق کی خلاف ورزی کی توان کے خلاف کارروائی کی جائے گی- اس سے قبل الیکشن کمیشن مشیر وزیراعظم انجینئرامیرمقام کو حلقے میں ترقیاتی کاموں کے اعلان پر نوٹس جاری کرچکا ہے جب کہ حلقہ پی کے 8 میں ضمنی انتخاب 12 مئی کو ہوگا۔