آرمی چیف جنرل قمر جاوید باجوہ سے چینی سفیر کی ملاقات
راولپنڈی:(ملت آن لائن) آرمی چیف جنرل قمر جاوید باجوہ سے چینی سفیر یاؤ جنگ نے ملاقات کی۔ پاک فوج کے شعبہ تعلقات عامہ (آئی ایس پی آر) کےمطابق آرمی چیف جنرل قمر جاوید باجوہ سے چینی سفیر نے جی ایچ کیو راولپنڈی میں ملاقات کی جس میں باہمی دلچسپ کے امور اور خطے کی سلامتی کی صورتحال پر تبادلہ خیال کیا گیا۔ آئی ایس پی آر کے مطابق جنرل قمر باجوہ سے ملاقات میں چینی سفیرنے خطے میں قیام امن کے لیے پاک فوج کی کاوشوں کو سراہا۔
……………………..
اس خبر کو بھی پڑھیے…بھارت میں پاکستانی ہائی کمشنر ہراسانی واقعات پر مشاورت کیلئے اسلام آباد طلب
اسلام آباد: پاکستان نے نئی دہلی میں سفارتی عملے کو ہراساں کیے جانے کے پے در پے کئی واقعات کے بعد بھارت سے اپنے ہائی کمشنر کو مشاورت کے لیے طلب کرلیا ہے ۔ پاکستان نے بھارت سے اپنے ہائی کمشنر کو واپس بلالیا ہے، ذرائع کا کہنا ہے کہ بھارت میں متعین پاکستانی ہائی کمشنر سہیل محمود کو سفارتی عملے کو ہراساں کیے جانے کے بعد مشاورت کے لیے واپس بلایا گیا ہے۔ دوسری جانب دفتر خارجہ کا کہنا ہے کہ ہائی کمشنر سے سفارتکاروں کو ہراساں کرنے کے واقعات پر مشاورت ہوگی جب کہ بھارتی ڈپٹی ہائی کمشنر کو دفتر خارجہ طلب کرکے واقعہ پر احتجاج بھی کیا گیا ہے۔
بھارت میں سینئر پاکستانی سفارت کار کو ہراساں کیا گیا واضح رہے کہ گزشتہ دنوں بھارت میں پاکستانی سفارت کاروں اور ان کے بچوں کو ہراساں کرنے کے واقعات پیش آئے تھے، پہلے واقعے میں نئی دہلی میں تعینات سینئر سفارتکار کی گاڑی کو ایک کار نے روکا اور سفارتکار کی گاڑی کو آگے نہیں جانے دیا گیا۔ پھر راستہ روکنے والی گاڑی میں سے ایک شخص نے اتر کر سفارتکار کی تصاویر کھینچیں۔ دوسرے واقعے میں پاکستانی سفارت کار کی گاڑی کو روک کر ان کے بچوں کو ہراساں کیا گیا۔