بھارتی فوج کی بٹل سیکٹر میں سکول وین پر فائرنگ، ڈرائیور شہید
لاہور:(ملت آن لائن)بھارتی فوج نے ایک بار پھر لائن آف کنٹرول پر سیز فائر معاہدے کی خلاف ورزی کرتے ہوئے اسکول وین کو نشانہ بنایا جس میں وین کا ڈرائیور شہید ہو گیا۔ پاک فوج کے شعبہ تعلقات عامہ آئی ایس پی آر کے مطابق بھارتی فوج کی جانب سے شہریوں کو نشانہ بنانے کا غیراخلاقی وغیرپشیہ ورانہ سلسلہ جاری ہے۔ آئی ایس پی آر کے مطابق بھارتی فوج نے ایل او سی پر بٹل سیکٹر میں بچوں کو لے جانے والی اسکول وین کو نشانہ بنایا، بھارتی فورسز کی بلا اشتعال فائرنگ سے اسکول وین کا ڈرائیور شہید ہوا۔ پاک فوج کے شعبہ تعلقات عامہ کے مطابق بھارتی فورسز کی جانب سے اسکول وین کو نشانہ بنایا جانا جنیوا کنونشن کی خلاف ورزی ہے۔ ڈی جی آئی ایس پی آر کی جانب سے سوشل میڈیا پر وین میں بیٹھی ہوئی ایک طالبہ کی ویڈیو بھی شیئر کی گئی جس میں وہ بھارتی اشتعال انگیزی کے بارے میں بتا رہی ہے۔
وزیراعظم کی مذمت
دوسری جانب وزیر اعظم شاہد خاقان عباسی نے ایل او سی پر اسکول وین پر بھارتی فائرنگ کی سخت مذمت کی ہے۔ ان کا کہنا تھا کہ بلااشتعال اور غیراخلاقی اقدامات سے بھارت کا اصل چہرہ بےنقاب ہوگیا ہے، بھارت معصوم شہریوں کو نشانہ بنا کرجنیوا کنونشن کی مسلسل خلاف ورزی کررہا ہے۔ شاہد خاقان عباسی نے شہید ڈرائیور کے بلند درجات اور لواحقین کے لئے صبرجمیل کی دعا کی۔