خبرنامہ پاکستان

دہشتگردوں کو کیفرِ کردار تک پہنچا کر دم لیں گے: وزیرِ داخلہ
پشاور:(ملت آن لائن) وفاقی وزیرِ داخلہ چودھری احسن اقبال نے زرعی ڈائریکٹوریٹ حملے کے زخمیوں کی عیادت کیلئے حیات آباد میڈیکل کمپلیکس کا دورہ کیا۔ اس موقع پر ان کے ہمراہ گورنر خیبر پختونخوا اور انجینئر امیر مقام بھی موجود تھے۔ انہوں نے دہشتگرد حملے کے شہدا اور زخمیوں کیلئے امداد کا اعلان بھی کیا۔ اس سے پہلے گورنر ہاؤس پشاور میں سیکیورٹی کے حوالے سے اعلیٰ سطح کا اجلاس کا ہوا جس میں وزیرِ داخلہ، گورنر خیبر پختونخوا اور انجینئر امیر مقام سمیت اعلیٰ حکام نے شرکت کی۔ اجلاس میں صوبے میں امن وامان کی صورتحال کا تفصیلی جائزہ لیا گیا اور شہدا کیلئے فاتحہ خوانی بھی کی گئی۔ وزیرِ داخلہ کا کہنا تھا کہ سیکیورٹی فورسز کی بروقت کارروائی سے بڑا نقصان نہیں ہوا۔ دہشت گردوں کو کیفرِ کردار تک پہنچا کر دم لیں گے۔