سینیٹ انتخابات کے لئے امیدواروں کی حتمی فہرست جاری
کراچی:(ملت آن لائن) الیکشن کمیشن نے 3 مارچ کو ہونے والے سینیٹ انتخابات کے لئے امیدواروں کی حتمی فہرست جاری کردی۔ چاروں صوبوں کی اسمبلیوں میں ہونے والی پولنگ میں سندھ اور پنجاب سے 12، 12 جب کہ خیبرپختونخوا اور بلوچستان سے 11،11 امیدواروں کا انتخاب عمل میں لایا جائے گا۔
سندھ
سینیٹ انتخابات کے لئے سندھ کی 12 نشستوں پر 33 امیدواروں میں مقابلہ ہوگا جن میں ایم کیو ایم پاکستان کے 14، پیپلز پارٹی کے 12، پاک سرزمین پارٹی کے 3، تحریک انصاف اور مسلم لیگ فنکشنل کے ایک ایک امیدوار میدان میں ہوں گے۔ ٹیکنو کریٹ کی نشست کے لئے 6 امیدواروں کے درمیان مقابلہ ہوگا جن میں پیپلز پارٹی کے ڈاکٹر سکندر میندھرو اور رخسانہ زبیری، ایم کیو ایم پاکستان کے حسن فیروز، ڈاکٹر قادر خانزادہ اور علی رضاعابدی جب کہ تحریک انصاف کے نجیب ہارون شامل ہیں۔ سینیٹ کی جنرل نشستوں پر پیپلز پارٹی کے رضا ربانی، مرتضیٰ وہاب، مصطفیٰ نواز کھوکھر، مولا بخش چانڈیو، امام الدین شوقین، ایاز احمد اور محمد علی شاہ جاموٹ بھی میدان میں ہوں گے۔ ایم کیو ایم پاکستان کے امیدواروں میں فروغ نسیم، کامران ٹیسوری، احمد چنائے، سید امین الحق، عامر چشتی اور فرحان چشتی شامل ہیں جب کہ پاک سرزمین پارٹی کے انیس احمد، ڈاکٹر صغیر اور سید مبشر امام شامل ہیں۔ مسلم لیگ فنکشنل کے سید مظفر حسین اور مسلم لیگ (ن) کے سرفرار جتوئی بھی سینیٹ امیدواروں میں شامل ہیں۔ سندھ سے اقلیتی نشست پر پیپلز پارٹی کے انور لعل دین، ایم کیو ایم پاکستان کے سنجے پروانی اور پاک سرزمین پارٹی کے ڈاکٹر موہن پاک امیدوار ہوں گے۔ خواتین کی خصوصی نشستوں پر پیپلز پارٹی کی قرۃ العین مری اور کیشو بائی امیدوار ہونگی جب کہ ایم کیو ایم کی جانب سے ڈاکٹر نگہت شکیل، کشور زہرا، نسرین جلیل اور منگلا شرما امیدوار ہوں گی۔
پنجاب
پنجاب سے ٹینکو کریٹ کی نشست پر مسلم لیگ (ن) کی جانب سے نصیر بھٹہ، حافظ عبدالکریم اور اسحاق ڈار امیدوار ہونگے، تحریک انصاف کے آصف جاوید اور پیپلز پارٹی کے نوازش پیرزادہ میدان میں ہوں گے۔ جنرل نشستوں پر حکمراں جماعت مسلم لیگ (ن) کے آصف کرمانی، مصدق ملک، رانا محمود الحسن، زبیر گل، مقبول احمد، ہارون خان اور شاہین خالد بٹ امیدوار ہوں گے جب کہ تحریک انصاف کے چوہدری محمد سرور، پیپلز پارٹی کے شہزاد علی خان اور مسلم لیگ (ق) کے کامل علی آغا امیدوار ہوں گے۔ پنجاب سے اقلیتی نشست پر کامران مائیکل مسلم لیگ (ن) اور وکٹر عذاریاہ پی ٹی آئی کے امیدوار ہوں گے جب کہ خواتین کی نشست پر سعدیہ عباسی اور نزہت صادق مسلم لیگ (ن) جبکہ عندلیب عباس تحریک انصاف کی امیدوار ہوں گی۔
خیبرپختونخوا
خیبرپختونخوا سے ٹینکو کریٹ کی نشست پر تحریک انصاف کے اعظم سواتی، مسلم لیگ (ن) کے دلاور خان، جے یو آئی (ف) کے یعقوب شیخ میدان میں ہوں گے جب کہ مولانا سمیع الحق اور نثار خان آزاد امیدوار ہوں گے۔ خواتین کی نشستوں پر تحریک انصاف کی مہرتاج روغانی، نورین فاروق خان میدان میں ہوں گی، قومی وطن پارٹی کی انیسہ زیب طاہر خیلی، پیپلز پارٹی کی روبینہ خالد، مسلم لیگ (ن) کی رئیسہ داؤد، جے یو آئی (ف) کی نعیمہ کشور، اے این پی کی شگفتہ ملک امیدوار ہیں جب کہ ثوبیہ شاہد آزاد امیدوار ہوں گی۔
بلوچستان
بلوچستان سے جنرل نشستوں پر بڑی تعداد آزاد امیدواروں کی ہے جن میں احمد خان، انوار الحق، حسین اسلام، سردار شفیق ترین، علاؤالدین، فتح محمد بلوچ، کہدہ بابر اور صادق سنجرانی شامل ہیں۔ جنرل نشستوں پر مسلم لیگ (ن) کے امیر افضل خان مندوخیل، نیشنل پارٹی کے محمد اکرم ، جے یو آئی (ف) کے مولوی فیض محمد، اے این پی کے نظام الدین کاکٹر اور بی این پی مینگل کے ہمایوں عزیز امیدوار ہوں گے۔ خواتین کی نشستوں پر مسلم لیگ (ن) کی ثمینہ زہری، نیشنل پارٹی کی طاہرہ خورشید، جے یو آئی (ف) کی عذرا سید میدان میں ہوں گی جب کہ ثناء جمالی، شمع پروین مگسی اور عابدہ عظیم آزاد امیدوار کے طور پر سینیٹ نشست کی دوڑ میں ہوں گی۔