عمران خان کا اپنی شادی پر انتہائی دلچسپ تبصرہ
کرک:(ملت آن لائن) چیئرمین تحریک انصاف عمران خان نے اپنی شادی سے متعلق خبر پر دلچسپ انداز میں تبصرہ کیا جس سے محفل میں قہقہے بکھر گئے۔ گزشتہ دنوں عمران خان کی بشریٰ مانیکا سے شادی کی خبریں منظر عام پر آئیں جو میڈیا کی زینت بنی رہیں لیکن بلآخر چیئرمین تحریک انصاف نے ٹوئٹر کے ذریعے شادی کی تردید کی۔
عمران خان کی اپنی روحانی رہنما سے تیسری خفیہ شادی؟
عمران خان کی تردید کے باوجود ان کی شادی کی خبروں پر تبصرے چلتے رہے اور مختلف باتیں سامنے آتی رہیں لیکن انہوں نے اس پر زیادہ بات نہیں کی مگر آج عمران خان کچھ خوشگوار موڈ میں نظر آئے اور شادی پر خوب بات کی۔ چیئرمین پی ٹی آئی نے خیبرپختونخوا کے ضلع کرک میں ایک تقریب سے خطاب کے دوران پہلی بار اپنی تیسری شادی پر کھل کر دلچسپ انداز میں تبصرہ کیا۔ عمران خان نے کہا کہ ’ایک دن صبح ورزش کرنے گیا، جب واپس آیا تو بہت سارے پیغامات ملے، ملازم نے بتایا کہ کئی سیاست دانوں کے فون آئے وہ آپ سے بات کرنا چاہتے ہیں’۔ چیئرمین تحریک انصاف نے ازراہِ مذاق کہا کہ کہ ’مجھے خوف ہوگیا کہیں رات سوتے ہوئے کسی کو قتل تو نہیں کردیا، پھر سوچا ٹرمپ نے پاکستان پر حملہ کردیا، پتا نہیں کیا ہوگیا کوئی معجزہ ہوگیا‘۔
آج تک بشریٰ بی بی کا چہرہ نہیں دیکھا، عمران خان
عمران خان نے انتہائی دلچسپ تبصرہ کرتے ہوئے کہا کہ ’میں نے سوچا کہیں مودی مسلمان ہوگیا یا نوازشریف کو پتا چل گیا انہیں کیوں نکالا، کہیں شہبازشریف نے شوبازی ختم کرنے کا فیصلہ کرلیا‘۔ چیئرمین پی ٹی آئی نے حاضری محفل کو محظوظ کرتے ہوئے کہا کہ ’کچھ دیر بعد مجھے پتا چلا کہ بہت بڑا جرم ہوگیا، پاکستان میں قومی بحران پید ہوگیا ہے اور عمران خان نے شادی کے لیے رشتہ مانگ لیا ہے‘۔ عمران خان کے تبصرے پر حاضرین محفل خوب محظوظ ہوئے اور محفل کشتِ زعفران ہوگئی۔