خبرنامہ پاکستان

فاٹا اصلاحات بل پیش نہ کرنے پر اپوزیشن کا واک آؤٹ
اسلام آباد:(ملت آن لائن)قومی اسمبلی کا اجلاس ایک مرتبہ پھر فاٹا بل پیش نہ کرنے اور اپوزیشن کے واک آؤٹ کے بعد کورم نہ پورے ہونے پر ملتوی کردیا گیا۔ قومی اسمبلی کا اجلاس اسپیکر سردار ایاز صادق کی زیرصدارت شروع ہوا تو حکومت کی جانب سے آج بھی فاٹا اصلاحات بل ایوان میں پیش نہ کیا جاسکا۔ فاٹا اصلاحات بل پیش نہ کرنے پر اپوزیشن ارکان احتجاج ایوان سے واک آؤٹ کر کے چلے گئے جس کے بعد کورم پورا نہ ہونے کی نشاندہی پر اجلاس ملتوی کردیا گیا۔ ایوان میں اظہار خیال کرتے ہوئے پیپلز پارٹی کے رکن اسمبلی سید نوید قمر نے کہا کہ قومی خزانے سے بھاری رقم ایوان پر خرچ ہوتی ہے لیکن کچھ حاصل نہیں، قومی اسمبلی ایجنڈے سے فاٹا سے متعلق نکات راتوں رات نکال لیے جاتے ہیں. انہوں نے مزید کہا کہ حکومت کے وزیر نے خود تسلیم کیا کہ دھرنے پر حکومت تنہا ہوگئی، حکومت کو تنہا رہ جانے کے معاملے سے سبق سیکھنا چاہیے۔ اپوزیشن کے واک آؤٹ کے دوران وزیر سیفران عبدالقادر بلوچ نے اظہار خیال کرتے ہوئے کہا کہ فاٹا بل پر تھوڑا سا موقع اور دے دیں ، اپوزیشن نے صرف فاٹا پر ایک نکتہ ذہن میں رکھا ہوا ہے، فاٹا بل میں مزید تاخیر نہیں کریں گے اور جلد پیش کردیا جائے گا۔ عبدالقادر بلوچ نے کہا کہ اپوزیشن کی تین بار حکومت آئی انہیں کبھی فاٹابل لانے کی توفیق نہیں ہوئی، فاٹا کے لوگوں کو جو حقوق ملنے ہیں مل جائیں گے ۔