خبرنامہ پاکستان

فوربز کی باصلاحیت نوجوانوں کی فہرست میں 9 پاکستانی بھی شامل

لاہور:(ملت آن لائن) معروف امریکی کاروباری جریدے فوربز نے 30 انڈر 30 کی سالانہ فہرست جاری کردی جس میں 7 پاکستانی بھی شامل ہیں۔ سنہ 2016 سے آغاز کی جانے والی اس فہرست میں اس سال بھی کئی پاکستانی اپنی جگہ بنانے میں کامیاب ہوئے ہیں جن میں سب سے نمایاں نام گلوکارہ مومنہ مستحسن کا ہے۔ فہرست میں پاکستان، بنگلہ دیش اور بھارت سمیت ایشیا کے 24 ممالک کے 30 سالہ یا اس سے کم عمر نوجوان شامل ہیں جنہوں نے مختلف شعبوں میں نمایاں کارکردگی کا مظاہرہ کیا ہے۔ فہرست کی ہر کیٹیگری میں 30 نوجوانوں کو شامل کیا جاتا ہے جس میں فنون و لطیفہ، سائنس و ٹیکنالوجی، کھیل، کاروبار اور دیگر شعبوں کے افراد شامل ہیں۔ فہرست میں شامل پاکستانیوں میں سعدیہ بشیر، کوئینز ینگ لیڈر ایوارڈ یافتہ سید فیضان حسین، حمزہ فرخ، عدنان شفیع، عدیل شفیع، محمد اسد رضا، ابراہیم شاہ اور محمد شہیر نیازی شامل ہیں۔ ان نوجوانوں نے سائنس، صحت، تعلیم، کاروبار اور سماجی خدمات کے شعبے میں اپنے قائم کردہ اسٹارٹ اپس کے ساتھ نمایاں کارکردگی دکھائی۔ مومنہ مستحسن کو فہرست میں فنون لطیفہ کی کیٹیگری میں جگہ دی گئی ہے جنہوں نے اپنی شہرت کو معاشرے میں مثبت تبدیلیوں اور سماجی خدمات کے لیے استعمال کیا۔