خبرنامہ پاکستان

اسلام آباد: (ملت+آئی این پی) قانونی اصلاحات (ترمیمی) بل 2015ء قومی اسمبلی نے کثرت رائے سے مسترد کردیا جبکہ وزیر قانون زاہد حامد نے کہا ہے کہ آئینی ترمیم کے بغیر یہ بل منظور نہیں ہو سکتا‘ سپریم کورٹ کے ازخود نوٹس پر اپیل کا حق ملنا چاہیے،اعلی عدلیہ کے سو موٹو اختیار کے معاملے پے آئین میں ترمیم کرنے کی ضرورت ہے،سوموٹو نوٹس کے خلاف اپیل کے حق کا میں بھی حامی ہوں،اس معاملے پر قانون میں ترمیم کی بجائے آئین میں ترمیم ضروری ہے۔ منگل کو قومی اسمبلی کے اجلاس میں ایاز سومرو نے تحریک پیش کی کہ قانونی اصلاحات (ترمیمی) بل 2015ء قائمہ کمیٹی کی رپورٹ کردہ صورت میں زیر غور لایا جائے۔ وفاقی وزیر زاہد حامد نے کہا کہ میں نے پہلے بھی کہا تھا کہ سپریم کورٹ کے ازخود نوٹس پر اپیل کا حق دینے کے حوالے سے قانون سازی آئین میں ترمیم کے ذریعے ہی کی جاسکتی ہے۔ گزشتہ روز اس حوالے سے چوبیسیویں ترمیم کے خلاف اپوزیشن ارکان نے بڑھ چڑھ کر تقاریر کیں۔ یہ انسانی حقوق کا مسئلہ ہے۔ سپریم کورٹ کے ازخود نوٹس پر اپیل کا حق ملنا چاہیے۔ یہ بل آئینی ترمیم کے بغیر منظور نہیں ہو سکتا۔ ایاز سومرو نے کہا کہ یہ ازخود نوٹس کا بل نہیں یہ بل ایگزیکٹو مجسٹریٹ کے حوالے سے ہے۔ زاہد حامد نے کہا کہ یہ بل 184 سے متعلقہ ہے۔ ایگزیکٹو مجسٹریٹ کا بل بھی آرہا ہے۔ ایاز سومرو نے کہا کہ میری طبیعت ٹھیک نہیں تھی جس کی وجہ سے اس کو موخر کرنے کی درخواست کی تھی۔ اس بل کو اور کچھ وقت کے لئے موخر کیا جائے۔ وفاقی وزیر زاہد حامد نے کہا کہ اس بل کو واپس لیا جائے یا مسترد کیا جائے۔ چوبیسویں ترمیم آچکی ہے۔ ڈپٹی سپیکر نے کہا کہ چوبیسیویں ترمیم کمیٹی کے پاس ہے اس کو موخر نہیں کیا جاسکتا۔ قومی اسمبلی نے بل کو کثرت رائے سے مسترد کردیا۔( و خ )