خبرنامہ پاکستان

لاہور (ملت آن لائن) ملک بھر میں تیز آندھی اور بارش سے مختلف واقعات میں 6 افراد جاں بحق اور درجنوں زخمی ہو گئے،کئی مقامات پرچھتیں،سائن بورڈز ،درخت اور کھمبے گرنے کے واقعات بھی پیش آئے،فیڈر ٹرپ ہونے سے متعدد علاقے تاریکی میں ڈوب گئے جبکہ ہوائی اڈوں سے درجنوں پروازیں بھی منسوخ کر دی گئیں۔ ملک کے مختلف علاقوں میں رات گئے آندھی اور بارش سے مختلف حادثات پیش آئے،لاہور میں نوے کلومیٹر فی گھنٹہ سے چلنے والی آندھی اور بارش سے لیسکو کا نظام مفلوج ہوگیا اور ایک سو اسی فیڈر ٹرپ کر گئے،مختلف علاقوں میں کھمبے اور سائن بورڈز گرنے کے واقعات پیش آئے،شاہدرہ میں درخت گرنے سے 32 سالہ بشارت جاں بحق ہو گیا جبکہ موسم کی خرابی کے باعث کئی پروازیں منسوخ کر دی گئیں۔ ڈیرہ اسماعیل خان کے علاقے مریالی میں مکان کی چھت گرنے سے خاتون اور بچی جاں بحق ہو گئیں جبکہ 6 افراد زخمی ہو گئے،لوئر دیر میں دیوار گرنے سے ایک شہری جاں بحق ہو گیا،ڈی آئی خان میں ہی آسمانی بجلی گرنے سے ایک شخص جاں بحق ہو گیا،جڑواں شہروں میں بھی آندھی کے باعث سائن بورڈز گرنے کے کئی واقعات ہوئے ۔ جبکہ کئی پراوزیں بھی منسوخ کر دی گئیں۔ فیروز والا میں تیز آندھی سے سائن بورڈ گرنے سے دوافراد زخمی ہو گئے،شیخوپورہ کرکٹ سٹیڈیم میں آندھی کے باعث بجلی کی تاریں ٹوٹ گئیں،تاریں گرنے سے گاڑی کو آگ لگ گئی۔