اسلام آباد:(ملت آن لائن)مقامی موٹرڈیلرز نے نان فائلرز کے نئی گاڑیوں کی خریدار پر پابندی کو اسلام آباد ہائی کورٹ میں چیلنج کردیا۔
تفصیلات کے مطابق اسلام آباد ہائی کورٹ میں نان فائلرز پر نئی گاڑیوں کی خریداری پرپابندی سے متعلق کیس کی سماعت جسٹس عامرفاروق نے کی۔
معزز جج جسٹس عامر فاروق نے درخواست گزار کے وکیل بابراعوان سے مکالمہ کرتے ہوئے کہا کہ اپنی ہی ترمیم کو چیلنج کرنے آگئے جس پر انہوں نے کہا جی اپنی ہی ترمیم کو چیلنج کیا ہے۔
عدالت نے استفسار کیا کہ کیا فنانس سپلیمنٹری بل 2018 میں یہ شقیں شامل ہیں جس پربابراعوان نے جواب دیا کہ ضمنی بجٹ میں انکم ٹیکس آرڈیننس 227 اے اور بی آئین سے متصادم ہیں۔
درخواست گزار کے وکیل نے کہا کہ نئی گاڑیوں کے لیے فائلر ہونے کی شرط لگانا غیرقانونی ہے، پرانی مرسیڈیز خرید لیں کوئی پابندی نہیں ہے، عوامی توقعات سے متصادم کوئی قانون نہیں بنایا جا سکتا۔
اسلام آباد ہائی کورٹ نے فریقین کے دلائل سننے کے بعد سیکریٹری فنانس، چیئرمین ایف بی آر اور ڈی جی موٹر رجسٹریشن کو نوٹس جاری کردیے۔
واضح رہے کہ مقامی موٹرڈیلرز نے اسلام آباد ہائی کورٹ میں انکم ٹیکس آرڈیننس 2001 میں ترمیم کو چیلنج کیا ہے۔