ن لیگ نےالیکشن پر اثرانداز ہونے کے لیے بجٹ پیش کیا ہے: فواد چوہدری
اسلام آباد:(ملت آن لائن+اے پی پی) پی ٹی آئی رہنما فواد چوہدری کا کہنا ہے کہ ن لیگ نےالیکشن پر اثرانداز ہونے کے لئے بجٹ پیش کیا ہے. ان خیالات کا اظہار انھوں نے اے آر وائی نیوز سے گفتگو کرتے ہوئے کیا، فواد چوہدری نے کہا کہ 29 اپریل کے جلسے میں عمران خان معاشی ترجیحات بھی بتائیں گے.
پی ٹی آئی ترجمان کا کہنا تھا کہ موجودہ حکومت نے جو بجٹ پیش کیا اس کی آئینی حیثیت نہیں ہے، آرٹیکل 86 کے تحت حکومت کو 4 ماہ کا بجٹ دینا چاہیے تھا. فوادچوہدری نے ن لیگ پر تنقید کرتے ہوئے کہا کہ جہاں مفادات کا ٹکراؤ ہوتا ہے، وہاں یہ لوگ بیانیہ بھی بدل لیتےہیں، اس بجٹ کا مقصد الیکشن پر اثر انداز ہونا ہے. یاد رہے کہ آج ن لیگ نے اپنا چھٹا بجٹ پیش کیا، جس کا حجم 56.30 روپےکھرب مختص کیا گیا ہے، جب کہ آئندہ مالی سال کے لیے ترقیاتی بجٹ کا حجم ایک ہزار تیس ارب روپے رکھا گیا۔ دوسری جانب پی ٹی آئی نے وزیر خزانہ کی بجٹ تقریر سے پہلے ایک اجلاس منعقد کیا تھا، جس میں بجٹ سیشن کے دوران شدید احتجاج کا فیصلہ کیا گیا. بعد ازاں پی ٹی آئی کے مرکزی رہنما شاہ محمود قریشی نے اسمبلی میں تقریر کرتے ہوئے کہا کہ موجودہ حکومت جو بجٹ پیش کررہی ہے اس کا کوئی اخلاقی جواز نہیں. دوران اجلاس شدید بدنظمی دیکھنے میں آئی، پی ٹی آئی اور ن لیگ کے ارکان اسمبلی دست و گریباں ہوگئے، مراد سعید اور عابد شیر علی کے درمیان بات ہاتھا پائی تک پہنچ گئی۔