اسلام آباد (آئی این پی)وزارت صحت پاکستان اور گلوبل فنڈز کے درمیان صحت کے شعبے میں اصلاحات اورموذی امراض پر قابو پانے کیلئے 25کروڑ50لاکھ ڈالر امداد کی فراہمی کا فریم ورک معاہدہ طے پا گیا، وزیرخزانہ اسحاق ڈار نے کہا کہ فنڈز سے مختلف قسم کی بیماریوں کی روک تھام میں مدد ملے گی، فنڈز سے ٹی بی سمیت دوسرے امراض میں مبتلاافراد مستفید ہوں گے۔تفصیلات کے مطابق بدھ کو وزارت صحت اور گلو بل فنڈز کے درمیان فریم ورک معاہدہ طے پا گیا۔معاہدے کے تحت گلوبل فنڈ پاکستان کوٹی بی، ملیریا اور ایڈزپرقابوپانے کیلئے 25 کروڑ 50 لاکھ ڈالر دے گا اور یہ رقم 3 سال میں فراہم کی جائے گی۔ معاہدے پر دستخط کرنے کی تقریب کے موقع پر وزیرخزانہ اسحاق ڈارنے تقریب سے خطاب کرتے ہوئے کہا کہ صحت کے شعبے میں گلوبل فنڈ پاکستان کو امداد فراہم کررہا ہے اور اس امداد سے مختلف بیماریوں کی روک تھام میں مدد ملے گی۔ تقریب سے خطاب کرتے ہوئے وزیرمملکت برائے صحت سائرہ افضل تارڑ نے کہا کہ گلوبل فنڈ کی صحت کے شعبے میں امداد پر شکرگزار ہیں ، یہ اہم معاہدہ ہے جس سے صحت پروگرام کو آگے بڑھانے میں مدد ملے گی۔ اس موقع پر گلوبل فنڈ کے نمائندے نے کہا کہ اقوام متحدہ اور گلوبل فنڈ پاکستان میں صحت کے شعبہ میں تعاون کیلئے پرعزم ہے،معاہدے سے گلوبل فنڈ اور پاکستان میں تعلقات فروغ پائیں گے، خوشی ہے کہ پاکستان صحت کے شعبے پر خصوصی توجہ دے رہا ہے۔(اح)
خبرنامہ پاکستان
وزارت صحت اور گلوبل فنڈز میں موذی امراض پر قابو پانے کیلئے امداد فراہمی کا معاہدہ طے
![](http://www.millat.com/wp-content/uploads/2016/02/zzdfdsf.jpg)