خبرنامہ پاکستان

اسلام آباد:(آئی این پی) وزیراعظم نوازشریف کامیاب اوپن ہارٹ سرجری کے بعد آج باضابطہ طور پر پھر سے اپنی ذمہ داریاں سنبھالیں گے جبکہ آئندہ ہفتے وہ عبدالستارایدھی کے انتقال پر اہل خانہ سے اظہار تعزیت کرنے کیلئے کراچی جائیں گے۔ وزیر اعظم نواز شریف آج سے اپنی ذمہ داریاں ایک بار پھر سنبھال رہے ہیں ، اور اس ضمن میں وہ آج وہ وفاقی وزراء سے ملاقاتیں اور ملکی سیاسی صورت حال سمیت حکومتی امور پر تبادلہ خیال کرینگے ، ملاقاتوں میں پانا ما لیکس اور اپوزیشن کی جانب سے ممکنہ تحریک جیسے معاملات بھی زیر غور آئیں گے۔ اس دوران وفاقی وزیر خزانہ اسحاق ڈار وزیرا عظم کو بریفنگ دیں گے۔ پاکستان پیپلز پارٹی اور پاکستان تحریکِ انصاف نے الیکشن کمیشن میں وزیراعظم کی نااہلی کے لیے ریفرنس دائر کیا ہوا ہے ۔ دو روز قبل وزیرِ اعظم نواز شریف لندن میں دل کے کامیاب آپریشن اور آرام کے بعد وطن واپس پہنچے تھے، نواز شریف 22 مئی کو علاج کی غرض سے برطانیہ گئے تھے جہاں 31 مئی کو ان کی اوپن ہارٹ سرجری ہوئی تھی۔