پاکستان دوسرے ملکوں کےمعاملات میں عدم مداخلت کی پالیسی پرعمل پیرا ہے‘ وزیراعظم
اسلام آباد:(ملت آن لائن) وزیراعظم شاہد خاقان عباسی کا کہنا ہے کہ پاکستان اور مالدیپ کے درمیان تعلقات دوستی، باہمی احترام اور مشترکہ مفادات پرمبنی ہیں۔ تفصیلات کے مطابق وفاقی دارالحکومت اسلام آباد میں وزیراعظم شاہد خاقان عباسی سے مالدیپ کے وزیرخارجہ ڈاکٹرعاصم نے ملاقات کی۔
وزیراعظم نے دونوں برادر ملکوں کے درمیان تعلقات میں فروغ پراطمینان کا اظہار کیا۔
وزیراعظم شاہد خاقان عباسی نے ملاقات میں کہا کہ پاکستان دوسرے ملکوں کے معاملات میں عدم مداخلت کی پالیسی پرعمل پیرا ہے۔ دوسری جانب مالدیپ کے وزیرخارجہ ڈاکٹرعاصم نے اپنے ملک اور عوام کے لیے پاکستان کے جذبات کو سراہا۔انہوں نے خطے میں امن واستحکام قائم رکھنے سے متعلق پاکستان کے اقدامات کے لیے مالدیپ کی حمایت کا بھی اعادہ کیا۔
مالدیپ میں ایمرجنسی نافذ‘ چیف جسٹس گرفتار
یاد رہے کہ چار روز قبل مالدیپ کے صدر عبداللہ یامین کی جانب سے ایمرجنسی کے نفاذ کے بعد پولیس نے سپریم کورٹ کے چیف جسٹس سمیت 2 ججز کو حراست میں لے لیا تھا۔