خبرنامہ پاکستان

پاکستان نے جانیں دے کر امن کی خواہش کو عملی جامہ پہنایا:خواجہ آصف

فیصل آباد: (ملت آن لائن) افغان سر زمین سے دہشت گرد آج بھی ہماری سرحدوں پر حملے کر رہے ہیں :وزیر خارجہ کا فیصل آباد میں تقریب سے خطاب، وزیر خارجہ خواجہ آصف نے کہا ہے کہ پاکستان نے جانیں دے کر امن کی خواہش کو عملی جامہ پہنایا، آج بھی افغان سرزمین سے دہشتگرد ہماری سرحدوں کو نشانہ بنا رہے ہیں ۔ فیصل آباد میں لیپ ٹاپ تقسیم کرنے کی تقریب سے خطاب کے دوران ان کا کہنا تھا کہ ووٹ کی حرمت کا تحفظ ہم سب کی ذمہ داری ہے ، اسے قومی فریضہ سمجھ کر انجام دیں ، ذاتی مفادات کیلئے کبھی ووٹ کی طاقت کو استعمال نہ کریں۔ انہوں نے کہا کہ سیاست گالی اور تصادم کا نام نہیں بلکہ محبت اور خدمت کا نام ہے، وزیر اعظم گالیوں سے نہیں بلکہ عوامی خدمت کرنے سے بنتے ہیں۔
……………………………..
اس خبر کو بھی پڑھیے….قصور:معمولی جھگڑے پر سسرالیوں نے بہو کو پیٹرول چھڑک کر آگ لگادی

قصور:(ملت آن لائن) صوبہ پنجاب کے ضلع قصور کے گاؤں لدھیکی میں سسرالیوں نے معمولی جھگڑے پر مبینہ طور پر بہو کو پیٹرول چھڑک کر آگ لگا دی۔ خاتون کو تشویشناک حالت میں جناح اسپتال لاہور منتقل کر دیا گیا، جہاں ان کی حالت تشویشناک بتائی گئی۔ اسپتال ذرائع کے مطابق خاتون کا جسم 80 فیصد تک جھلس چکا ہے۔ سسرالیوں کے ہاتھوں مبینہ طور پر جھلس جانے والی 27 سالہ خاتون تین بچوں کی ماں بتائی جاتی ہے۔ ورثاء نے الزام عائد کیا ہے کہ خاتون کا کچھ روز سے سسرالیوں سے جھگڑا چل رہا تھا، جنہوں نے اسے پیٹرول چھڑک کر آگ لگائی اور چیخ و پکار سن کر محلے داروں نے انہیں اطلاع دی۔ خاتون کے ورثاء نے وزیراعلی پنجاب شہباز شریف اور چیف جسٹس میاں ثاقب نثار کو واقعے کا نوٹس لیتے ہوئے انصاف فراہم کرنے کی اپیل کی ہے۔
…………………………………..
اس خبر کو بھی پڑھیے….عمران خان کی دعوت ولیمہ بنی گالہ میں سادگی سے ہوگی، پی ٹی آئی

اسلام آباد:(ملت آن لائن) چیئرمین تحریک انصاف عمران خان کی دعوت ولیمہ کی تقریب بنی گالہ میں سادگی سے ہوگی۔ ترجمان تحریک انصاف کی جانب سے جاری بیان میں کہا گیا ہے کہ آئندہ چند روز میں بنی گالہ میں سادگی سے عمران خان کی تقریب ولیمہ کا انعقاد ہوگا جس میں رب العالمین کا شکر ادا کیا جائے گا۔ ترجمان کا کہنا ہے کہ عمران خان کے دعوت ولیمہ کو خصوصی طور پر محدود رکھنے کا بھی فیصلہ کیا گیا ہے۔
عمران خان کی بشریٰ بی بی سے شادی کی تصدیق
ہنی مون کے لئے بیرون ملک جانے کی خبروں کے حوالے سے ترجمان نے کہا کہ عمران خان نے فوری بیرون ملک سفر نہ کرنے کا فیصلہ کیا ہے اور ان کی لندن یا سعودی عرب روانگی کی اطلاعات میں صداقت نہیں۔ خیال رہے کہ عمران خان کی شادی کی خبر سب سے پہلے دی نیوز کے رپورٹر عمر چیمہ نے بریک کی تھی تاہم اس وقت تحریک انصاف نے اس کی تردید کی اور اب گزشتہ روز پی ٹی آئی نے عمران خان اور بشریٰ مانیکا کے نکاح کی تصاویر جاری کرتے ہوئے اس خبر کی تصدیق کی۔