پشاور ہائیکورٹ کا سانحہ آرمی پبلک اسکول کی پولیس رپورٹ عام کرنے کا حکم
پشاور(ملت آن لائن) ہائی کورٹ نے سانحہ آرمی پبلک اسکول کی پولیس رپورٹ عام کرنے کا حکم دیتے ہوئے کیس کو نمٹا دیا۔ پشاور ہائی کورٹ میں سانحہ آرمی پبلک کیس کی سماعت چیف جسٹس یحی آفریدی اور جسٹس افسر شاہ نے کی ۔ محکمہ انسداد دہشتگردی حکام نے عدالت میں انکوائری رپورٹ جمع کرادی گئی جس پر عدالت نے حکم جاری کیا کہ عوام انکوائری کے بارے میں جاننا چاہتی ہے اس لیے رپورٹ عام کردی جائے ۔ سانحہ آرمی پبلک کے خلاف شہداء فورم نے درخواست دائر کی تھی جس میں جوڈیشل کمیشن بنانےاور تحقیقاتی رپورٹ عام کرنے کی درخواست کی تھی ۔ سماعت کے دوران چیف جسٹس پشاور ہائیکورٹ نے کہا کہ جوڈیشل کمیشن بنانا ہائیکورٹ کا اختیار نہیں بلکہ صوبائی حکومت کا اختیار ہے اس لیے وہ یہ درخواست اسے بھیج دیتے ہیں۔ یاد رہے کہ 16 دسمبر 2014 کو پشاور کے آرمی پبلک اسکول پر دہشت گردوں کے حملے میں اساتذہ سمیت 144طلباء شہید ہوئے گئے تھے۔