خبرنامہ پاکستان

کراچی:(اے پی پی) مشیر اطلاعات سندھ مولا بخش چانڈیو کا کہنا ہے کہ چوہدری نثار ملک کو تصادم کی سیاست کی طرف کیوں دھکیلنا چاہتے ہیں لیکن انہیں تصادم کی سیاست راس نہیں آئے گی۔ سندھ حکومت کی جانب سے وزارت داخلہ کو بھیجی گئی رینجرز اختیارات کی سمری مسترد ہونے پر مشیر اطلاعات مولا بخش چانڈیو نے اپنے رد عمل کا اظہار کرتے ہوئے کہا کہ رینجرز اختیارات کی سمری ہر بار اسی طرح ہی جاری کی گئی لیکن اس بار سمری پر اعتراض کیوں ہورہا ہے۔ انہوں نے کہا کہ چوہدری نثار ملک کو تصادم کی سیاست کی طرف کیوں دھکیلنا چاہتے ہیں، انہیں تصادم کی سیاست راس نہیں آئے گی، وزیر داخلہ آرٹیکل 147 کی تشریح کہاں سے لائے ان کی تشریح سمجھ سے بالاتر ہے۔ پیپلزپارٹی کے رہنما اور صوبائی مشیر سینیٹر سعید غنی کا کہنا تھا وزیراعلیٰ سندھ اسمبلی اختیارات کے مطابق فیصلے کررہے ہیں اور رینجرز کو سندھ اسمبلی کے فیصلے کی روح کے مطابق اختیارات دیے جب کہ جہاں ضروری ہو رینجرز کی تعیناتی سندھ حکومت کا اختیار ہے۔ انہوں نے کہا کہ رینجرز تعیناتی کا اختیار چوہدری نثار کے پاس نہیں لہذا وہ وائسرائے بننے کی کوشش نہ کریں جب کہ چوہدری نثار دہشت گردی کے خلاف جنگ پر اتفاق رائے سبوتاژ کرناچاہتے ہیں۔ وزیراعلیٰ سندھ سید مراد علی شاہ نے رینجرز کے قیام میں ایک سال جب کہ کراچی آپریشن کے لئے خصوصی اختیارات میں 90 روز کی توسیع کی منظوری دی تھی۔