ڈاکٹر عامر لیاقت کا دوبارہ سیاسی سفر شروع کرنے کا فیصلہ
کراچی:(ملت آن لائن) معروف ٹی وی میزبان ڈاکٹر عامر لیاقت حسین نے اگلے ہفتے سے دوبارہ سیاست میں قدم رکھنے کا اعلان کردیا۔ ان خیالات کا اظہار انھوں نے اے آر وائی کے پروگرام ہر لمحہ پرجوش میں کیا۔ عامر لیاقت نے سیاسی سرگرمیوں کا اعلان کیا، البتہ انھوں نے اس ضمن میں کسی سیاسی جماعت کا نام نہیں لیا۔
یاد رہے کہ عامر لیاقت کا شمار پاکستان ٹی وی انڈسٹری کے ممتاز شخصیات میں ہوتا ہے۔ وہ سیاسی پس منظر بھی رکھتے ہیں۔ کچھ عرصے قبل انھوں نے سیاست سے کنارہ کشی کا فیصلہ کیا تھا، مگر اب وہ ایک بار پھر سیاست میں قدم رکھنے کا ارادہ باندھ چکے ہیں۔ پروگرام میں عامر لیاقت نے میزبان وسیم بادامی کے ایک سوال کا جواب دیتے ہوئے میاں نواز شریف، عمران خان اور آصف زرداری میں عمران خان کو بہترین انتخاب قرار دیا، اس دوران ان سے کھٹے میٹھے سوالات کیے گئے، جس کا انھوں نے حاضر دماغی سے جواب دیے۔ خیال رہے کہ گذشتہ دنوں یہ خبر زیر گردش تھی کہ عامر لیاقت حسین پاکستان تحریک انصاف میں شمولیت اختیار کرنے جارہے ہیں تاہم انہوں نے سیاسی میدان میں اترنے کا فیصلہ مؤخر کردیا تھا۔ واضح رہے کہ عامر لیاقت حسین نے اپنا سیاسی کیریئر متحدہ کے پلیٹ فارم سے شروع کیا اور وہ مشرف دورِ حکومت میں وفاقی وزیر برائے مذہبی امورکا قلمدان سنبھال چکے ہیں، گزشتہ برس 22 اگست سے قبل عامر لیاقت نے متحدہ میں دوبارہ شمولیت کا اعلان کیا تھا تاہم ملک مخالف نعروں کے اگلے روز ہونے والی پریس کانفرنس میں انہوں نے فاروق ستار کا ساتھ دینے کا اعلان کیا تھا۔