ڈھائی سال سے لاپتہ بچی کا باپ فریاد لے کر زینب کے گھر پہنچ گیا
لاہور:(ملت آن لائن) صوبہ پنجاب کے دارالحکومت لاہور سے ڈھائی سال قبل لاپتہ ہونے والی بچی کا باپ اپنی فریاد لے کر زینب کے گھر پہنچ گیا۔ والد کا کہنا تھا کہ پولیس چاہے تو زینب کے قاتل کی طرح میری بیٹی کا پتہ بھی لگا سکتی ہے۔ تفصیلات کے مطابق لاہور کے علاقے کاہنہ سے لاپتہ ہونے والی سویرا 7 سال کی ہے۔ سویرا کے والد سفیان حسین اپنی فریاد لے کر زینب کے گھر پہنچ گئے۔ سفیان حسین کا کہنا ہے کہ ان کی بیٹی ڈھائی سال سے لاپتہ ہے۔ ’مقدمہ درج ہے لیکن پولیس ٹال مٹول کر رہی ہے۔ جب پولیس کے پاس جاؤں کہتے ہیں ڈھونڈ رہے ہیں‘۔ والد کا کہنا تھا کہ معصوم بچی کس حال میں ہوگی سوچ کر ہماری نیند اڑ جاتی ہے۔ اگر پولیس چاہےتو زینب کے قاتل کی طرح میری بیٹی کا پتہ بھی لگا سکتی ہے۔ یاد رہے کہ قصور کی 7 سالہ زینب کا قاتل گزشتہ روز گرفتار کرلیا گیا جو زینب کے علاوہ بھی کئی بچیوں کے ساتھ زیادتی و قتل میں ملوث ہے۔ ملزم عمران کا ڈی این اے زینب کے پاس سے ملنے والے ڈی این اے سے میچ کرگیا تھا جس کے بعد پولیس نے اسے گزشتہ روز دوبارہ گرفتار کرلیا تھا۔ ملزم، معصوم زینب کا محلے دار تھا اور گزشتہ کئی سالوں سے اسی گھر میں رہائش پذیر تھا۔