خبرنامہ پنجاب

لاہور:(اے پی پی) پنجاب کا آئندہ مالی سال کے لئے 1650 ارب روپے کا بجٹ آج پیش کیا جائے گا اس سلسلے میں صوبائی کابینہ کا اجلاس بھی طلب کرلیا گیا ہے۔ وزیرخزانہ پنجاب ڈاکٹرعائشہ غوث پاشا آئندہ مالی سال کا بجٹ پیرکی سہہ پہر صوبائی اسمبلی میں پیش کریں گی، اس سے قبل وزیراعلیٰ شہبازشریف کی سربراہی میں صوبائی کابینہ کا اجلاس ہوگا جس میں بجٹ تجاویز کی منظوری دی جائے گی۔ وزارت خزانہ پنجاب کے ذرائع کے مطابق نئے مالی سالی کے لئے پنجاب کے بجٹ کا تخمینہ تقریباً 1650 ارب روپے لگایا گیا ہے جس میں پنجاب کو این ایف سی کے تحت قابل تقسیم محاصل کی مد میں اندازاً 1045 ارب روپے ملنے کا امکان ہے جب کہ مجموعی طور پر صوبائی آمدنی کا تخمینہ 285 ارب روپے اور 320 ارب روپے دیگر ذرائع سے حاصل ہونے کا تخمینہ ہے۔ پنجاب کے آئندہ مالی سال کے مجموعی بجٹ میں اخراجات جاریہ کا تخمینہ 1100 ارب روپے جبکہ ترقیاتی اخراجات کا تخمینہ 550 ارب روپے لگایا گیا ہے۔ بجٹ میں کوئی نیا ٹیکس عائد نہ کرنے کی تجویزہے، سرکاری ملازمین کی تنخواہوں اورپنشن میں اضافہ وفاق کی جانب سے کئے گئے 10 فیصد اضافے کے مطابق کیا جائے گا۔ بجٹ میں کوئی میگا پراجیکٹ زیرغورنہیں ہے تاہم اورنج ٹرین کے منصوبے کو مکمل کیا جائے گا جب کہ تعلیم ، صحت اور مواصلات سمیت دیگر محکموں کی نئی ترقیاتی سکیمیں آئندہ مالی سال کے بجٹ میں شامل ہوں گی۔ دریں اثنا پنجاب کی وزیرخزانہ ڈاکٹرعائشہ غوث پاشا نے کہا ہے کہ پنجاب کا آئندہ مالی سال بجٹ دوررس نتائج کا حامل ہوگا، جس میں عام آدمی پرکم سے کم بوجھ ڈالا جائے گا، ٹیکس نیٹ میں اضافے کے لئے لگژری سروسز پر توجہ مرکوزکی جائے گی، چھوٹے کاروباری حضرات پران کی بساط سے بڑھ کربوجھ نہیں ڈالا جائے گا۔ پراپر ٹی ٹیکس کی وصولیوں کا کلیہ بھی متوسط طبقے کے مسائل کو مد نظر رکھتے ہو ئے وضع کیا جائے گا۔