خبرنامہ پنجاب

حافظ آباد (ًٌٹ + آئی این پی) پولیس نے جلالپور بھٹیاں کے قریب تلاشی کے دوران ایک گاڑی سے بھاری مقدار میں اسلحہ برآمد کرکے ایک ملزم کو گرفتار کرلیا۔ حافظ آباد کی تحصیل جلال پور بھٹیاں میں پولیس نے خفیہ اطلاع پر گاڑیوں کی تلاشی شروع کررکھی تھی، تلاشی کے دوران قبائلی علاقے سے آنے والی ایک گاڑی سے بھاری مقدار میں اسلحہ برآمد کرلیا گیا۔ پولیس نے گاڑی کے ڈرائیور کو حراست میں لے کر تفتیش شروع کردی۔ ڈی پی او حافظ آباد کے مطابق برآمد کئے گئے اسلحے میں مختلف اقسام کے 32 جدید ترین ہتھیار اور سیکڑوں گولیاں شامل ہیں، گرفتار کیے گئے شخص کا نام کلیم اللہ ہے اور اس کا تعلق حافظ آباد ہی کے ایک گاؤں چک چٹھہ سے ہے، کلیم اللہ قبائلی علاقے سے غیر قانونی طور پر اسلحہ لاکر پنجاب کے مختلف علاقوں میں فراہم کرتا تھا۔