خبرنامہ پنجاب

لاہور (آئی این پی) لاہور ہائی کورٹ نے پانامہ لیکس کی بنیاد پر وزیراعظم نواز شریف اور ان کے خاندان کے خلاف دائر کی گئی ایک اور درخواست سماعت کیلئے منظور کرلی۔ جمعرات کو نجی ٹی وی کے مطابق لاہورہائی کورٹ میں شہری اخترحسین کی جانب سے پانامہ لیکس کی بنیاد پرشریف خاندان کے خلاف ایک اوردرخواست جمع کرائی گئی۔ جسٹس شاہد وحید نے رجسٹرار کی جانب سے عائد اعتراض ختم کرنے کے بعد شہری اختر حسین کی درخواست سماعت کے لئے منظور کرلی۔ درخواست گزارنے کہا کہ نوازشریف سمیت دیگر پاکستانی شخصیات نے قومی دولت لوٹی، نیب کی سفارشات سے قبل جوڈیشل کمیشن بنانا بے معنی ہوگا لیکن نیب سفارش کرے تو ضرورت پڑنے پرجوڈیشل کمیشن بنایا جائے۔واضح رہے کہ گزشتہ روزہائی کورٹ نے پانامہ لیکس کی بنیاد پر وزیراعظم نواز شریف کو نااہل قرار دینے کی درخواست سماعت کے لیے منظورکرلی تھی۔(اح)