خبرنامہ پنجاب

لاھور(ملت آن لائن)پنجاب کے مختلف علاقوں میں رینجرز، قانون نافذ کرنے والے اداروں، سی ٹی ڈی اور پولیس کی جانب سے کی گئی مختلف کارروائیوں کے دوران 2 دہشتگرد ہلاک جب کہ درجنوں مشکوک افراد کو حراست میں لے لیا گیا ہے۔پاک فوج کے شعبہ تعلقات عامہ کے مطابق ڈیرہ غازی خان میں آپریشن رد الفساد کے تحت خفیہ اطلاعات کی بنیاد پر پنجاب رینجرز نے آپریشن کیا۔ اس دوران فائرنگ کے تبادلے میں 2 دہشتگرد ہلاک ہوگئے۔ مارے گئے دہشتگرد یوم علی ؓ کے موقع پر دہشتگردی کا منصوبہ بنارہے تھے۔سی ٹی ڈی نے ملتان میں شجاع آباد کے علاقے کالی پل کے پاس کارروائی کرتے ہوئے 3 مبینہ دہشتگردوں کو گرفتار کرکے ان کے قبضے سے دستی بم، اسلحہ اور دیگر بارودی مواد برآمد کرلیا ہے۔ دہشت گردوں کی شناخت عبدالحمید، لال گل اور دین محمد کے نام سے ہوئی ہے۔ اس کے علاوہ لاہور کے تھانہ نواں کوٹ پولیس نے بکر منڈی کے علاقے میں سرچ آپریشن کرتے ہوئے 20 ملزمان کو حراست میں لے لیا۔