منتخب کردہ کالم

اسکندر اعظم کے جانشین سے ملاقات!…عطا ء الحق قاسمی

میں نے ایک بڑے آدمی سے پوچھا’’آپ ٹیلیفون‘‘ بجلی، پانی اور گیس وغیرہ کے بلوں کی ادائیگی کیلئے کبھی شدید دھوپ میں ایک لمبی قطار میں کھڑے ہوئے ہیں۔‘‘بڑے آدمی نے حیرت سے پوچھا’’کیا یہ بل بھی ادا کرنا ہوتے ہیں؟‘‘میں نے جواب دیا’’ہم لوگوں کو تو ادا کرنا پڑتے ہیں۔ آپ بھی کبھی کبھی تو ادا کرتے ہی ہوں گے۔ کیا اس کام کیلئے آپ خود لائن میں لگتے ہیں؟‘‘ بڑے آدمی نے کہا’’لائن میں لگیں میرے دشمن ہمارے کمی کمین کس مرض کی دوا ہیں؟‘‘۔
میں نے پوچھا’’کیا آپ کو کبھی تھانے جانا پڑا ہے اور وہاں تھانیدار نے دو چار گالیوں کے ساتھ اپنے قدموں میں بیٹھنے کیلئے کہا ہے؟‘‘۔بڑا آدمی غصے سے بولا’’کس کی مجال ہے وہ مجھے تھانے میں بلائے اور اس طرح کا سلوک کرے۔ یہ سب ذلتیں آپ لوگوں کیلئے ہیں۔‘‘ میں نے پوچھا’’آپ کو کبھی عدالتوں کے چکر لگانا پڑے ہیں اور عدالتی اہلکاروں کے ذلت آمیز رویے اور ان کی فرمائشوں سے پالا پڑا ہے؟‘‘۔
بڑا آدمی بولا’’تم کیسی باتیں کررہے ہو کیوں ہمیں کھینچ کھانچ کر اپنی سطح پر لارہے ہو؟۔‘‘
میں نے پوچھا ’’کیا آپ کو کبھی عدالتوں سے انصاف ملا ہے اور اگر ملا ہے تو اس میں کتنے عشرے لگے ہیں؟۔‘‘
بڑا آدمی بولا’’انصاف ہمارے گھر کی لونڈی ہے کوئی اور بات کرو۔‘‘
میں نے بڑے

آدمی کو مخاطب کیا اور کہا ’’کیا کبھی آپ کو جوہڑ کا پانی پینے کا اتفاق ہوا ہے؟۔‘‘
یہ سن کر بڑے آدمی کو ابکائی سی محسوس ہوئی چنانچہ میں نے جواب کا انتظار کئے بغیر اگلا سوال پوچھا’’کیا آپ نے کبھی ملاوٹ والی مرچیں، چائے ، دودھ، گھی اور دوسری اشیائے خورونوش استعمال کی ہیں؟۔‘‘
بڑا آدمی یہ سن کر ناراض ہوا اور بولال’’ملاوٹ والی چیزیں تم جیسے لوگ استعمال کرتے ہیں اور پھر مختلف بیماریوں میں مبتلا ہو کر سسک سسک کر مرجاتے ہیں۔‘‘
مجھے اس بڑے آدمی کے لہجے سے لگ رہا تھا کہ شاید وہ میرے کسی اور سوال کا جواب نہیں دے گا تاہم میں نے سوالوں کا سلسلہ جاری رکھا کیونکہ مجھے ایک احساس یہ بھی ہوا تھا کہ میرے سوالات سے اس کی انا کی تسکین ہورہی ہے اور اس کی بظاہر ناراضی میں مسرت کی ایک جھلک بھی شامل ہے چنانچہ میں نے پوچھا’’آپ کو اپنے کسی عزیز سے ملاقات کیلئے جیل میں قدم قدم پر پیش کئے جانے والے نذرانوں کے مرحلوں سے گزرنا پڑتا ہے اور اس کے باوجود گھنٹوں دھوپ میں بیٹھ کر انتظار کرنے کا تجربہ ہوا ہے؟۔‘‘
یہ سن کر بڑے آدمی نے گردن تان کر جواب دیا ’’مجرم میرے اپنے لوگ ہوتے ہیں جیلر میرے ایک اشارے پر انہیں ملاقات کیلئے میرے گھر چھوڑ جاتا ہے۔‘‘
میں نے سوال کیا ’’کیا کبھی ایسا تو نہیں ہوا کہ بیمار پڑنے پر آپ علاج کرانے کی پوزیشن میں نہ ہوں۔‘‘ اس پر بڑے آدمی نے قہقہہ لگایا، شاید یہی میرے سوال کا جواب تھا۔میں نے پوچھا’’کیا آپ کی کوئی بیٹی جہیز کے انتظار میں بوڑھی ہوگئی ہے اور اس کی شادی نہیں ہوئی؟‘‘
بڑے آدمی نے ناگوار لہجے میں نان سنس کہا، اس کے بعد مجھے اگلا سوال نہیں پوچھنا چاہئے تھا مگر میں نے پوچھ لیا ’’کیا آپ کے ننھے منے بچوں کو گھر کا خرچ چلانے کیلئے کسی ورکشاپ میں یا ہوٹل میں چھوٹے کے طور پر کام کرنا پڑا ہے؟۔‘‘ ’’اس بڑے آدمی نے سخت لہجے میں کہا تمہیں ایسی بات کرتے ہوئے شرم آنی چاہئے۔‘‘
اور پھر مجھے واضح شرم آگئی ورنہ میں نے ابھی اس سے پوچھنا تھا کہ کیا آپ کو کبھی دس ہزار روپے ماہوار میں گھر کا خرچ چلانے کا تجربہ ہوا ہے۔ کیا کبھی آپ کے چار پانچ سال کی عمر کے کسی بچے کے ساتھ ایسا سانحہ ہوا ہے کہ وہ کسی ا میر آدمی کے اسی عمر کے بچے کا ملازم ہو، اسے گود میں کھلاتا ہو، اس سے مار کھاتا ہو اور کبھی غلط ہاتھ پڑنے پر رو بھی نہ سکتا ہو کہ اس صورت میں پھر اس کے گھر والوں سے مارپڑتی ہو۔ اس کے سامنے اس کا مالک اور اہلخانہ عمدہ کھائے اور پھل اور آئس کریم کھائے اور منہ دوسری طرف پھیر کر اپنے آنسو ضبط کرنے کی کوشش کرتا ہو۔ میں نے یہ سب باتیں اور اس کے علاوہ بہت سی باتیں بڑے آدمی سے پوچھنا تھیں، مگر میں نے محسوس کیا کہ ماحول بہت Tenseہوگیا ہے چنانچہ میںنے گفتگو کا رخ سیاست کی طرف موڑتے ہوئے پوچھا’’ موجودہ حکومت کے بارے میں آپ کا کیا خیال ہے؟‘‘مگر اس نے میرے سوال پر قہقہہ لگاتے ہوئے کہا’’کون سی حکومت؟‘‘ میں نے اسے ابھی تک کافی ناراض کرلیا تھا، چنانچہ اٹھنے سے پہلے اسے خوش کرنے کیلئے کہا کیونکہ میں جانتا تھا کہ میں چھوٹا آدمی ہوں اور وہ بڑا آدمی ہے اس لئے میں نے مودبانہ انداز میں کہا’’آپ صحیح کہتے ہیں، مگر ہم ہر طرح کی صورتحال میں آپ ہی کی طرف دیکھتے ہیں کیونکہ آپ جاگیردار بھی ہیں ،ایم این اے بھی ہیں ،وزیر بھی ہیں اور گدی نشین بھی ہیں اوریوں طاقت کے سارے منبع آپ کے پاس ہیں ۔ سائیں ہم نے تو دو ا بھی آپ سے لینی ہے اور دعا بھی!‘‘
یہ سن کر بڑا آدمی خوش ہوا اور اس نے مجھ سے پوچھا تم نے کوئی اور سوال تو نہیں کرنا۔
میں نے کہا نہیں جناب میں اب آپ سےا جازت چاہتا ہوں۔اس پر بڑے آدمی نے اپنے منشی کو بلایا اور کہا’’اسے ایک تھیلا آٹے کا اور ایک تھیلا چاول کا دے کر رخصت کرو‘‘پھر مجھے مخاطب کرکے بولا’’ہمارے در سے آج تک کوئی خالی ہاتھ نہیں گیا۔‘‘
حالانکہ اس بڑے آدمی نے ایک دن اسکندر اعظم کی طرح اپنے ہی در سے خالی ہاتھ جانا تھا۔