سرفراز بگٹی بلوچستان کے نوجوان وزیر داخلہ ہیں جن کے خلاف چند روز قبل نایاب جنگلی جانور مارخور کے غیر قانونی شکار کا مقدمہ درج کیا گیا ہے۔یہ خبر پڑھتے ہوئے اچانک منیر نیازی کا ایک شعر یاد آیا اور میں چونک اٹھا۔اس غیر قانونی شکار اور منیر نیازی کے شعر میں کیا تال میل اور مناسبت ہے ،اس سے پہلے مارخور کا تعارف ہو جائے ۔ مارخور سینگوں والے پہاڑی بکرے کو کہتے ہیں جس کا نام فارسی سے مستعار لیا گیا ہے اور اس کے معانی ہیں ـ”سانپ کھانے والا ‘‘۔قیام پاکستان سے پہلے مارخور گلگت اور چترال سمیت شمالی علاقہ جات ،بلوچستان کے بعض علاقوں اور ڈیرہ غازیخان کے علاقے فورٹ منرو میں بکثرت پائے جاتے تھے۔مگر جب سے پاکستان نے مارخور کو قومی جانور قرار دیا ہے، اس کا وجود خطرے میں ہے اور عالمی اداروں کے مطابق اب مارخور کا شمار ایسی نوع کے جانوروں میں ہوتا ہے جن کے معدوم ہونے کا خطرہ ہے۔ مگر اس کے باوجودپاکستان وہ واحد ملک ہے جہاں قومی جانور کے شکار کی اجازت ہے اور کوئی بھی ملکی یا غیر ملکی شکاری محکمہ تحفظ جنگلی حیات کو فیس ادا کر کے مارخور کے شکار کا اجازت نامہ حاصل کر سکتا ہے۔جب ہم نے مارخور کو قومی جانور قرار دیا تو لگ بھگ 40ہزار مارخور موجود تھے مگر آج ان کا تخمینہ دو ہزار لگایا جاتا ہے۔خداجانے کسی آسیب کا سایہ ہے یا کچھ اور ،ہمارے ہاں جس شے پر ہاتھ رکھا جاتا ہے ،اس کے برے دن شروع ہو جاتے ہیں۔دیودارانتہائی پائیدار درخت ہے جس کی لکڑی بہت مضبوط اور عمدہ ہوتی ہے۔یہ درخت محض اپنے قد و قامت کے لحاظ سے ہی منفرد و ممتاز نہیں بلکہ عمر کے اعتبار سے بھی بینظیر ہے۔دیودار کے درخت اوسطاً ایک ہزار سال تک زندہ رہتے ہیں۔مگر اس کی بدقسمتی کا فسانہ بھی مارخور سے ملتا جلتا ہے۔ پاکستان کا قومی درخت قرار دیئے جانے کے بعد دیودار بتدریج ناپید ہوتا چلاجا رہا ہے۔محتاط تخمینے کے مطابق قیام پاکستان کے وقت دیودار کے دس لاکھ درخت تھے مگر اب ان میں سے صرف ایک لاکھ ہی باقی رہ گئے ہیں،ان کے زندہ رہ جانے کی وجہ بھی شاید ان کی درازی عمر ہے۔
ہمارے قومی نشان اور استعاروں کی حالتِ زار دیکھنا ہوتو پاکستان ہاکی فیڈریشن کی لاچارگی وبے بسی ملاحظہ کریں یا پھر قومی زبان اور قومی لباس کی بے توقیری دیکھ لیں۔ہاکی کے زوال کا یہ عالم ہے کہ جو ٹیم کبھی عالمی چیمپئن ہوا کرتی تھی ،آج ورلڈ کپ کے لیے کوالیفائی کرنے سے بھی قاصر ہے۔اسی طرح اردو کو قومی زبان قرار دیا گیا اور آج اردو کا کوئی پرسان حال نہیں ۔سپریم کورٹ کا واضح فیصلہ آنے کے باوجود اردو کو سرکاری زبان کی حیثیت سے رائج نہیں کیا جا سکا اور ہوتا بھی کیسے ،یہ عدالتی فیصلہ بھی انگریزی میں تحریر کیا گیا۔ہمارے ہاں اردو بولنے والے شرماتے ہیں اور انگریزی بولنے والے اِتراتے ہیں۔شلوار قمیص ہمارا قومی لباس ہے لیکن جب ہمارے حکمران بیرون ملک دوروں پر جاتے ہیں تو پینٹ کوٹ اور ٹائی میں ملبوس نظر آتے ہیں ۔میں پینٹ کوٹ پہنتا ہوں ،ٹائی بھی لگا تا ہوں ،اس میں کوئی حرج نہیں لیکن اگر قومی لباس پہنتے ہوئے کسی کو شرم آتی ہے تو اس سے بڑھ کر لمحہ فکریہ کیا ہو سکتاہے ۔باالخصوص وہ لوگ جو ریاست کی نمائندگی کرتے ہیں ،انہیں تو قومی علامات کو ملحوظ خاطر رکھنا چاہئے۔کبھی کبھی یوں محسوس ہوتا ہے جیسے ہم احساس کمتری کا شکار ہیں ۔ہم کپڑے کی دکان پر جاتے ہیں تو کہتے ہیں پاکستانی نہیں جاپانی کپڑا دکھائو۔الیکٹرانکس کی مارکیٹ میں چلے جائیں تو جاتے ہی فرمائش کرتے ہیں کہ امپورٹڈ آئٹمز دکھائو۔ہمارا قومی پھول چنبیلی ہے جسے جاسمین بھی کہتے ہیںمگر ہم سب کو گلاب پسند ہے ۔میں گلی محلے کی بات نہیں کرتا ،آپ کسی یونیورسٹی میں چلے جائیں اور طلبہ و طالبات سے پانچ سوالات پوچھیں ،پاکستان کا قومی جانور کونسا ہے؟پاکستان کا قومی پرندہ کونسا ہے؟پاکستان کا قومی درخت کونسا ہے ؟پاکستان کا قومی پھل کونسا ہے ؟اور پاکستان کا قومی مشروب کیا ہے؟اگر یہ پڑھے لکھے نوجوان ان پانچ سوالات میں سے دو سوالات کے بھی صیح جواب دے سکیں تو سمجھ لیں میرا مفروضہ غلط ہے اور پاکستانیت زندہ ہے ۔چکور پاکستان کا قومی پرندہ ہے مگر بیشتر پاکستانیوں نے اسے زندگی بھر نہیں دیکھا ہو گا۔ہاں البتہ چکور واحد قومی علامت ہے جو ہمارے مزاج سے بھائو کھاتی ہے۔ماہرین کا خیال ہے کہ چکور ایسا پرندہ ہے جو چاند سے بہت پیار کرنا چاہتا ہے ،اسے چاند کو چھونے کی آرزو بیتاب کرتی ہے ،یہ اونچی اڑان بھرنا چاہتا ہے مگر جذباتیت کے باعث اکثر ناکام رہتا ہے اور اڑتے اڑتے جان سے ہاتھ دھو بیٹھتا ہے۔چاہنے والے اپنے محبوب پر جاں نثار کرتے ہیں ،قربان ہو جاتے ہیں مگر ہمارا باوا آدم ہی نرالا ہے۔ ہم جس سے پیار کرتے ہیں ،اسی پر وار کرتے ہیں۔پاکستان کے علاوہ عراق دوسرا ملک ہے جس نے چکور کو قومی پرندہ قرار دیا ہے۔گنے کا رس ہمارا قومی مشروب ہے مگر ہم آج تک اسے معیاری پیکنگ میں بطور برانڈ رجسٹر نہیں کروا سکے اس کے بجائے ہمارے ہاں نیلے ،پیلے ،ہرے اور کالے مشروبات سے رغبت پائی جاتی ہے جو مہنگے بھی ہیں اور مضر صحت بھی۔آم ہمارا قومی پھل ہے ،پاکستان میں آم کی سب سے زیادہ انواع و اقسام پائی جاتی ہیں ،پاکستانی آم دنیا بھر میں اپنی لذت اور ذائقے کے باعث مقبول ہیں ۔اگر حکومت چاہتی تو آموں کی برآمد سے کثیر زرمبادلہ کمایا جا سکتا تھا مگر دیگر قومی استعاروں ،علامات اور نشانات کی طرح آم کی بے قدری و بے توقیری میں بھی کوئی کسر نہیں چھوڑی گئی۔جو قوم اور جو ملک اپنے قومی نشانات ،علامات اور استعاروں کی قدر نہ کر سکے ،اس کی قدر و منزلت میں اضافہ کیسے ممکن ہے؟
آپ قومی اداروں کو دیکھ لیں ،پی آئی اے سے ریلوے اور پی ٹی وی سے اسٹیل ملز تک جتنے بھی اداروں اور کمپنیوں کے ساتھ پاکستان کا لاحقہ جڑا ہے ان سب کا ستیاناس ہوا ہے۔لیکن جونہی یہ قومی ادارے پرائیویٹائز ہوتے ہیں،ان کی تقدیر بدل جاتی ہے اور یہ دن دگنی رات چوگنی ترقی کرنے لگتے ہیں۔ایسے میںبیچارے سرفراز بگٹی کا کیا قصور،اس نے تو قومی علت وجبلت کے ہاتھوں مجبور ہو کر مارخور کا شکار کیا ہے۔منیر نیازی مرحوم کی دوراندیشی اور فہم و فراست پر رشک آتا ہے ،برسہا برس پہلے ایک ہی شعر میں ہماری جبلت بیان کر گئے:
اسے زہریلی خوشبوئوں کے رنگین ہار دیتا ہوں
میں جس سے پیار کرتا ہوں اسی کو مار دیتا ہوں
منتخب کردہ کالم
میں جس سے پیار کرتا ہوں (ترازو) محمد بلال غوری
![](http://www.millat.com/wp-content/uploads/2017/03/sarfraz-bugti.jpg)