خبرنامہ سندھ

کراچی (ملت آن لائن + آئی این پی) گورنر سندھ محمد زبیر سے ڈائریکٹر جنرل (DG) آڈٹ سندھ احمد خان سومرو نے گورنر ہاؤس میں ملاقات کی۔ ملاقات میں ڈی جی سندھ آڈٹ نے گورنر سندھ کو ادارہ کی سالانہ کارکردگی رپورٹ پیش کرتے ہوئے ادارہ کی مجموعی کارکردگی سے متعلق تفصیل سے آگاہ کیا۔بریفنگ میں ڈی جی آڈٹ سندھ نے بتایا کہ عوامی فلاحی بہبود کے ترقیاتی منصوبوں میں شفافیت برقرار رکھنے کے لئے اقدامات کو یقینی بنایا جار ہا ہے ، اداروں میں فنڈ ز کی جانچ پڑتال ، اسکروٹنی سمیت دیگر اقدامات اٹھائے جارہے ہیں۔ اس موقع پر گورنر سندھ نے کہا کہ ترقیاتی منصوبے عوام کی سہولیات کے لئے بنائے جاتے ہیں ، ترقیاتی منصوبوں میں خریداری اور روز مرہ کے معاملات میں شفافیت یقینی بنانا حکومت کی اولین ترجیح ہے یہ بات خوش آئند ہے کہ نگرانی کے اداروں بشمول آڈٹ سندھ کے فعال کردار سے کرپشن ، بد انتظامی اور غیر قانونی چیزوں میں کمی واقع ہو رہی ہے لیکن ہمیں اس ضمن میں مزید اقدامات اٹھانا ہو نگے۔ انہوں نے کہا کہ اداروں میں فنڈز کے آڈٹ سے قواعد و ضوابط پر عمل درآمد ، بد انتظامی اور کرپشن پر کنٹرول میں کافی مدد ملتی ہے اس کے ذریعہ قومی وسائل کے درست سمت میں استعمال کے ساتھ ساتھ بے جا اخراجات اور ضائع ہونے سے بچا جا سکتا ہے،اس عمل سے قوم کی امانت کی نگرانی موئثر ثابت ہو رہی ہے۔ انہوں نے ڈائریکٹر جنرل آڈٹ سندھ کی جانب سے دی جانے والی بریفنگ پر اپنے اطمینان کا اظہار کرتے ہوئے ادارہ کی کارکردگی کو بھی سراہا۔ گورنر سندھ نے کہا کہ صوبہ کے شعبہ ہائے زندگی سے تعلق رکھنے والے تمام اداروں کو اسی وڑن کے ساتھ کام کرنا چاہئے تاکہ عوام کی توقعات پر پورا اترا جا سکے۔