خبرنامہ سندھ

نو منتخب میئر:(اے پی پی) نو منتخب میئرکراچی وسیم اختر پر درج 2 تازہ مقدمات میں جے آئی ٹی کا نو ٹیفکیشن جاری کردیا گیا ، محکمہ داخلہ سندھ نے اعلامیے میں بتایا ہے کہ سینئر سپرنٹنڈنٹ کی سربراہی میں قائم کی گئی جے آئی ٹی میں تمام حساس اداروں اور رینجرز کا ایک ایک افسر شامل ہوگا۔ کراچی کے نو منتخب میئر کو اب جوائنٹ انویسٹی گیشن ٹیم کی تحقیقات سے گزرنا پڑے گا اور ان سے یہ تحقیق ضلع ملیر میں درج کیے گئے 2 حالیہ مقدمات سے متعلق ہوگی۔ جی ہاں ، وسیم اختر میئر بننے کے بعد بھی گرداب سےنہیں نکل سکے ہیں، گزشتہ روز ہی کراچی کی چابی انھیں دی گئی لیکن جیل سے باہر آنے کی چابی ملنے میں انھیں شاید وقت لگے۔ وسیم اختر پر قائم مقدمات کی جے آئی ٹی بنانے کا فیصلہ حکومت سندھ نے کیا اوراس کا نوٹیفکیشن بھی جاری کردیاگیا ہے ۔ پولیس حکام کے مطابق ایم کیوایم کے رہنما پر سچل اور ملیر سٹی تھانے میں ریاست پاکستان کے خلاف مجرمانہ سازش، ملکی سالمیت کو نقصان پہنچانے اور انسداد دہشتگردی سمیت دیگر دفعات کے تحت مقدمات درج ہیں اور انھی الزامات سمیت دیگر پر تحقیقات کی جائے گی ۔ جے آئی ٹی کا سربراہ سندھ پولیس کا سینئر سپرنٹنڈنٹ ہوگا جبکہ اس میں آئی ایس آئی، ایم آئی، آئی بی، اسپیشل برانچ، سندھ رینجرز اور سی ٹی ڈی سے تعلق رکھنے والے گریڈ 18کے افسران شامل ہوں گے۔ وسیم اختر سے مشترکہ تحقیقاتی ٹیم جیل میں ہی تحقیقات کرے گی یا کہیں اور اس کا فیصلہ ابھی نہیں ہوا ۔